Colombiami aappassaannik qinersisoqartariaqartoq

Colombiami præsidentimut aappassaannik qinersisoqartariaqassaaq. Sapaammi qinersinermi taasinerit kisinneqareersullu tamanna paasinarsivoq.

Nutaarsiassaqartitsivik Reuters taama allappoq.

Gustavo Petro, saamerlerneersoq, taasinerit kisinneqarnerisa naammassiartorneranni paasinarsivoq 40 procentinit sinnilaarlugilluunniit taaguunneqarsimasoq.

Suliffeqarfiutilik, Rodolfo Hernandez, talerperlerneersoq taava tulliuppoq, 30 procentingajannit taanna taaguunneqarsimalluni.

Ajugaaniaraannilu 50 procentinit sinnerlugilluunniit taaguunneqarsimanissaq piumasaqaataammat qinersineq immikkoortut aappaannut ingerlaqqittariaqassaaq.

Qinersinerup immikkoortuata aappaanni ajugaasup maannamut præsidenti nuannarineqanngeqisoq, Iván Duque, kingoraassavaa.

Petrollu matumani ajugaasinnaanissaa ilimanarsinnaasoq, nutaarsiassaqartitsivik AFP allappoq.

Petro sakkulersorumatuunut ilaasortaanikuuvoq. Sakkulersorumatuut taakku eqqisseqatigiittoqarnissaa pillugu Colombiami naalakkersuisunik 1990-imi isumaqatigiissusiorput. Colombiami illoqarfiit pingaarnersaanni Bogotámi aamma borgmesteriusimavoq, Colombiamilu politikkikkut sulinermi ilisimaneqarluarluni.

Colombiami præsidentimut qinersinerup immikkoortuata aappaa juunip ulluisa 19-ianni pisussatut pilersaarutigineqarpoq.