Corona pillugu ullumikkut kisitsisit: Coronamik tunillatsissimasut 14-it uninngasut
Nuummi sisamanik, Sisimiuni marluk, Uummannami ataatsimik Paamiunilu ataatsimik napparsimmavinnut unitsitsisoqarsimasoq tallimanngornermi paasissutissiissutigineqarpoq.
Nuummi napparsimmavimmi uninngasut arfinillit Paamiunilu ataaseq angerlartinneqarput.
Misissuisarnermut periuseq nutaaq
Misissueriaaseq allanngortinneqarpoq, taamaalilluni ikittuinnaat, tassa covid-imik tunillatsinnermi napparsimarululersinnaasut kisimik PCR-imik misissortissinnaalerlutik:
Tassa utoqqaat inuillu uummatikkut puatigullu nappaateqartut misissortissinnaapput.
Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.
Tamanna misissuisarfiit napparsimmaviillu malinnaasinnaajunnaarnerannik pissuteqarpoq.
Nunatsinni napparsimmavinni uninngasut katillugit 14-iupput.
Nuummi tallimat, Paamiuni marluk, Sisimiuni pingasut, Ilulissani ataaseq, Uummannami ataaseq, Qaqortumi ataaseq Nanortalimmilu ataaseq napparsimmavimmi uninngapput.
Uninngasunit pingasut corona pingaarnertut pissutigalugu uninngapput. Taakkunannga ataaseq peruluttut uninngavianniippoq.
Sisamat allamik pissuteqartumik uninngapput, coronamilli tunillatsissimanerat napparsimanerannut aamma sunniuteqarpoq.
Napparsimmavimmi uninngasunit arfineq-marluk allamik pissuteqartumik uninngapput, coronamillu tunillatsissimanerat sunniuteqarnani.
Nakorsaaneqarfiuttaaq utoqqamik angerlarsimaffimmi arfininngormat toqusoqartoq paasissutissiisutigaa. Utoqqaq coronamik tunillatsissimaqqammerpoq, tamannali pissutigalugu toqunngilaq. Toquneranulli pissutaaqataasinnaasutut nalilerneqarluni.
