Corona pillugu ullumikkut kisitsisit: Tunillatsissimasut nutaat 270-it ippassarmit paasineqartut
Tunillatsissimasut nutaat 270-it paasineqarput.
Nakorsaaneqarfiup paasineqartut tamarmik PCR-imik misissuinermeersuusut paasissutissiissutigaa.
Nunatsinni tunillatsissimasut maanna katillugit 912-iupput - tunillatsissimasut tamaalillutik aatsaat taama amerlatigeqqipput. Nakorsaanerup nunatsinni tunillatsissimasut 719-iusut aatsaat taama amerlatiginerat ippassaq nalunaarutigaa.
Tamatuma saniatigut Narsami Nanortalimmilu sukkasuumik misissuutaasumik misissukkanit marluk paasineqarput. Taakku PCR-imik misissortinnerat maanna utaqqineqartoq, Nakorsaaneqarfik nalunaaruteqarpoq.
Killilersuutit nutaat
Coronapasimik takutitsisinnaanissamik piumasaqaat unnuap qeqqaniit illoqarfinni nunaqarfinnilu tuniluuffiup aallaaviata ilisimaneqannginneranik ulluni 14-ini kingullerni tunillatsittoqarfiusuni atuutissaaq.
Illoqarfiit nunaqarfiillu aqqi Nakorsaaneqarfiup nittartagaani, nun.gl-imi saqqummersinneqassapput.
Illoqarfik nunaqarfilluunniit allattorsimaffinnut ilanngunneqaruni, taava killilersuutit pingasut atuutilertassapput:
- Coronapasimik takutitsisinissamut piumasaqaat
- Tamanit ornigarneqarsinnaasuni isersimasinnaasut amerlanerpaaffissalernerat - tassa imaappoq qatserisartut amerlanerpaaffiusinnaasutut akuerisaata affaannaat isertinneqarsinnaassapput.
- Sumiiffinni tamani tamanut iserfigineqarsinnaasuni qanermut assiaquteqarneq.
Sumiiffinni ukunani tunillatsissimasut paasineqarput:
Pituffimmi qulit
Ilulissani 35-t
Uummannami ataaseq
Aasianni marluk
Sisimiuni arfineq-marluk
Kangerlussuarmi marluk
Maniitsumi 14-it
Nuummi 197-it
Narsami ataaseq
Qaqortumi ataaseq
Inuit katillugit sisamat napparsimmavimmi uninngapput: Ataaseq Ilulissani, ataaseq Sisimiuni marlullu Nuummi. Taakkunannga ataaseq Nuummi peruluttut uninngavianni uninngavoq.
Tunillatsissimasut amerlassusaat kommunikkaarlugit imaapput:
- Avannaata Kommunia: 68-it
- Kommune Qeqertalik: Arfineq-marluk
- Qeqqata Kommunia: 69-it
- Kommuneqarfiq Sermersooq: 763-it
- Kommune Kujalleq: Tallimat
Tunumi aamma tuniluuttoqarpoq, nunatsinnilu sumiiffinni amerlasuuni coronamik tunillatissimasoqarluni, Nakorsaaneqarfiullu inuit tamarmik sapinngisamik ikittuinnarnik qanillisaqartarnissaat sapinngisamillu katerinnerniittannginnissaat aamma angerlarsimaffimmi inngersuussutigaa.
Narsami peqqinnissaqarfimmi sulisuni covid-19-imik tunillatsissimasoqarnera pissutigalugu nalinginnaasunut pinasuanngitsumillu saaffiginninnernut ullumikkut matoqqavoq.
Nuummili coronamik tuniluuttoqarnerpaavoq.
- Inuit tallimat misissortikkaangata ataaseq tunillanneqarsimasarpoq, maannalu tuniluunneq ingerlarsoqaaq. Ukiaq sumiiffiit tuniluuffiusut imatorsuujunnaarput, maannali tuniluuffiusuni sivikitsuinnarmik qanillilaarsimasulluunniit tamarmik tunillanneqarsimasarput, aasaq killiffitsinnut sanilliullugu maanna pissutsit allaalluinnarput, nakorsaaneq ippassaq tusagassiortunik katersortitsinermi oqarpoq.
AAMMA ATUARUK Corona: Killilersuutit nutaat
Nakorsaanerup tunillatsissimasoqangaatsiarnera tunngavigalugu Omikron nunatsinnut anngussimanissaa qularutiginngilaa.
Taamaammat Naalakkersuisut siulittaasuata, Múte B. Egedep aamma peqqinnissamut naalakkersuisup, Kirsten Fenckerip (Naleraq) killilersuinerit nutaat unnuap qeqqanit atuutilertussat ippassaq saqqummiuppaat: Nunatsinni tamarmi illoqarfinni nunaqarfinnilu ulluni 14-ini kingullerni tuniluuffiup aallaaviata ilisimaneqannginneranik tunillatsissimasoqarfiusimasuni coronapasimik piumasaqaateqarneq atuutilerpoq.
Taanna Nuummi, Qasigiannguani Upernavimmi taakkualu nunaqarfiini Kangerlussuarmilu maanna atuuppoq. Sumiiffinnili arlalinni tunillatsissimasut amerliartorput - tassa Ittoqqortoormiini Qeqertarsuatsiaanilu, taamaammat sumiiffinni taakkunani marlunni killilersuutit amerlanerlernissaat ilimanarluinnarpoq.
Tassa imaappoq - coronapasimik takutitsisussaanerup saniatigut tamanit iserfigineqarsinnaasuni qanermut assiaquteqartoqassaaq - aamma imerniartarfiit neriniartarfiillu qatserisartut inoqarsinnaassusaatut innersuussutigisaasa affaannaat isersinnaatissavaat.
