Corona pillugu ullumikkut kisitsisit: Napparsimmavimmi uninngasut 16-it
Coronamik tunillatsissimasut napparsimmavimmi uninngasut nuna tamakkerlugu 16-iupput.
Nuummi uninngasut arfiniliupput, Sisimiuni sisamat, Aasianni marluk, Nanortalimmi marluk, Qaqortumi ataaseq Narsamilu ataaseq.
Misissuisarnermut periuseq nutaaq
Misissueriaaseq allanngortinneqarpoq, taamaalilluni ikittuinnaat, tassa covid-imik tunillatsinnermi napparsimarululersinnaasut kisimik PCR-imik misissortissinnaalerlutik:
Tassa utoqqaat inuillu uummatikkut puatigullu nappaateqartut misissortissinnaapput.
Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.
Tamanna misissuisarfiit napparsimmaviillu malinnaasinnaajunnaarnerannik pissuteqarpoq.
Napparsimmavimmi uninngasunit pingasut coronamik tunillatsissimanertik pingaarnertut pissutigaat.
Uninngasunit ataaseq covid-19-imik tunillatsissimanera nappaataannut ajoqusernerannulluuniit allamut unitsitsissutaasumut sunniuteqarpoq.
Uninngasunit aqqaneq-marluk allamik pissuteqarlutik uninngapput. Taakku coronamik tunillatsissimanerat paasineqarpoq, tamannali uninnganerannut sunniuteqanngilaq.
Peruluttut uninngavianniittoqanngilaq.
Agguaqatigiissillugu ukiui 80-iupput
Coronamik tunillatsissimallutik toqusut marluk pingasunngormamit nalunaarsorneqarpoq. Toqusup siulleq tassaavoq utoqqaq Paamiuneersoq, taanna coronamik tunillatsissimanini pissutigalugu napparsimmavimmi uninngalluni toquvoq. Toqusup aappaa tassaavoq utoqqaq Aasianneersoq, taanna coronamik qammatip kingulliup ingerlanerani coronamik tunillatseqqasimavoq.
Nunatsinni coronamik tunillatsissimallutik toqusut taamaalillutik katillugit aqqaneq-marlunngorput.
Nakorsaaneqarfiup coronamik tunillatsissimallutik toqusimasut ukiuisa agguaqatigiissinnerat ullumi saqqummersippaa – ukiuilu agguaqatigiissillugit 80,3-miippoq.
Coronamik tunillatsissimallutik toqusuni inuusunnerpaaq 68-inik ukioqarpoq, ukioqqortunerpaarlu 92-inik ukioqarluni.
Toqusimasut aqqaneq-marluk akornani arfineq pingasut coronamik tunillatsissimanerat toqunerannut sunniuteqarsimasoq, Nakorsaaneqarfiup oqaatigaa.
Nuna tamakkerlugu PCR-imik misissuinerit 125-t akissutersineqarput, taakkulu 39 procentii tunillatsissimapput.
Misissukkanit 125-nit 97-it Nuummeersuupput.
