Corona Tasiilami tuniluuttoq – nunatta ilarujussuani tuniluuppallaarunnariartortoq
tamatumuuna Tasiilami.
Atuarfimmi ilinniartitsisut sulisullu allat pingajorarterutingajaat napparsimapput – aamma napparsimmavimmi kommunimilu sulisut ”amerlasuut” napparsimapput.
Nakorsaaneqarfik taama nalunaaruteqarpoq.
Tasiilamit PCR-imit misissukkat 50-it akissutersineqarput, taakkunanngalu 30-t tunillatsissimasuupput. Tassa imaappoq tunillatsissimasut procentinngorlugu amerlassusaat 60 procentiuvoq. Tasiilami napparsimmavimmi suli uninngasoqanngilaq.
Misissueriaaseq allanngortinneqarpoq, taamaalilluni ikittuinnaat, tassa covid-imik tunillatsinnermi napparsimarululersinnaasut kisimik PCR-imik misissortissinnaalerlutik:
Tassa utoqqaat inuillu uummatikkut puatigullu nappaateqartut misissortissinnaapput.
Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.
Tamanna misissuisarfiit napparsimmaviillu malinnaasinnaajunnaarnerannik pissuteqarpoq.
Paamiuni corona aamma tuniluuppoq. Naalli nuna tamakkerlugu killilersuutit atorunnaarsinneqareeraluartut Tasiilami Paamiunilu atuarfinni nutaanik malittarisassaqarpoq: Atuartut angajulliit kingusinnerusukkut atuariartortassapput, atuaqatigiiaallu atuaqatigiiaanik allanik atuaqateqartassanngillat, atuartullu silamiinnerminni peqatigiiaaqatitik kisimik ilagisinnaavaat. Atuarfiullu iluaniinnerminni taamaallaat klassiminniissinnaallutik.
Illoqarfinni pingasuni tunillatsissimasut amerlanerpaaffissaanneereersut
Nunatta sinnerani PCR-imik misissukkanit 39 pricentit tunillatsissimasuupput. Kisitsit taanna januaarimi 60 procentimiittarpoq.
Nunatsinni tuniluunnerup eqqorluartumik qanoq innera ilisimaneqanngilaq. Napparsimarululersinnaasut kisimik PCR-imik misissortissinnaapput. Allat sinneri angerlarsimallutik peqqissinissartik utaqqissavaat, aamma imminnut peqqissisutut nalunaarutigisassapput.
AAMMA ATUARUK Killilersuutit atorunnaartut: Qanermut assiaqut unnuap-qeqqanit atorunnaassaaq
Periuseq taanna misissuisarfiit napparsimmaviillu tunillatsissimasorpassuaqarnera pissutigalugu angummanneq ajulermata atulerneqarpoq.
Taamaalilluni kikkunnik tamanik misissuisarneq nunatsinni coronamut sakkussaajunnaarpoq. Inuillu PCR-imi misissortittannginnerat, napparsimmaviliartannginnerat pissutigalugu tunillatsissimasorpassuit ilisimaneqanngillat.
Taamaakkaluartorli Aasianni, Nuummi Ilulissanilu tunillatsissimasut amerlanerpaaffissaanneereersut nakorsaanerup, Henrik L. Hansenip nalilerpaa. Illoqarfinni taakkunani pingasuni innuttaasut pingajorarterutaat nalugaqarput.
Illuatungaanili Sisimiuni, Maniitsumi nunatta kujataanilu suli tuniluuttoqarpoq. Qaanaami tunillatsissimasut aamma amerliartorput, tassanilu meeqqerivimmi ilaatigut tunillatsissimasunik paasisaqartoqartarluni.
Napparsimmavimmi uninngasimasut katillugit 130-t
Nunatsinni coronamik tuniluuttoqarnerani covid-19-imik tunillatsissimasutut paasineqarsimasut katillugit 130-t napparsimmavimmi uninngasimapput. Napparsimmavimmut unittut agguaqatigiissillugit 51-inik ukioqarput.
Covid-19-imik tunillatsissimasut napparsimmavimmi uninngasut maanna quliupput.
Pingasunngornermit ullumimut pingasunik nutaanik unitsitsisoqarpoq: Qaqortumi ataaseq, Nanortalimmi ataaseq Uummannamilu ataaseq.
Tamatuma saniatigut Nuummi sisamanik Sisimiunilu pingasunik napparsimmavimmi uninngasoqarpoq.
AAMMA ATUARUK Tamaat isigalugu: Coronavirus pillugu killiffik
Napparsimasunit marluk corona pingaarnertut pissutigaat. Taakkunannga ataaseq Nuummi Dronning Ingriup Napparsimmavissuani peruluttut uninngavianniippoq.
Uninngasunit pingasut covid-19-imik tunillatsissimanerat nappaataannut ajoqusernerannulluuniit allamut unitsitsissutaasumut sunniuteqarpoq.
Covid-19-imik tunillatsissimasunit uninngasunit pingasut allamik nappaateqanngikkunik ajoqusersimapput, tunillatsissimaneralli sunniuteqarluni.
Uninngasunit tallimat allamik pissuteqarlutik uninngapput. Taakku coronamik tunillatsissimanerat paasineqarpoq, tamannali uninnganerannut sunniuteqanngilaq.
Meeqqat marluk covid-imik tunillatsissimanermi kingunerluuteqarlutik napparsimmavimmi uninnganikuupput. Taakkunannga ataaseq angerlartinneqareerpoq.
