Corona tuniluutileqqissimammat Wuhanip ilaani killilersuisoqaqqittoq

Corona Kinami tuniluutileqqissimammat tamaani oqartussat killilersueqqillutillu inuit millionilikkaat mattuteqquaat.

Allattoq Ritzau

oktobarip 27-at 2022 08:27

Nutserisoq Karline Platou

Kinami illoqarfissuup Wuhanip inuini 800.000-t, coronap ukiut pingasut matuma siorna takkuteqqaarnerata kingorna coronartoqaqqilermat, mattuteqquneqarput.

Kinamilu illoqarfissuarni allani mattussinerit aamma pipput.

Tassa Kinap inuini millionilikkaat taama piumaffigineqarput.

AAMMA ATUARUK Kinami Sanyami takornariat 80.000-t missaat mattussisoqarnerani kanngittut

Kinamimi ullut pingasuinnaat ingerlaneranni 1000-nit ikinnerunngitsut coronamik tunillanneqarsimasut, ullumi sisamanngornermi nalunaarutigineqarpoq.

Tunillanneqarsimasullu taakku Europami tunillanneqarsimasut amerlassusaannut naleqqiullugu amerlagisassaanngikkaluartut, kinamiut taamatut paasineq ajorpaat, taakkumi coronamik tuniluuttoqalersillugu sakkortuumik politikkikkut aaqqiisarput.

Coronalu Wuhanimi 2019-imi tuniluutileqqaarneraniilli taama periuseqarput.

Wuhanip inuini 800.000-iusut oktobarip 30-ata tungaanut mattuteqquneqarput.

Nutaarsiassami kukkunermik nassaarsimaguit uunga allaffigineqarsinnaavugut.