Coronamik tunillatsissimasumik toqusoqaqqittoq
Nuummi Dronning Ingridiup Napparsimmavissuani uninngasoq, utoqqaq covid-19-imik tunillatsissimasoq sapaatiummat toquvoq.
Nakorsaaneqarfik taama nalunaaruteqarpoq.
Covid-19 toquneranut pingaarnertut pissutaasutut nalilerneqanngilaq, sunniuteqaqataasinnaassallunili.
Nunatsinni covid-19-imik pissuteqarlutik imaluunniit tunillatsissimasuullutik toqusut maanna 13-iupput.
Nunatsinni tamarmi PCR-imik misissukkat 127-t tallimanngormamit misissorneqarput. Taakku 24 procentii tunillatsissimasuupput.
Misissukkat tamarmik omikroniusut
PCR-imik misissukkat tamarmik Danmarkimi misissoqqissaarneqartussanngortinneqarput. Misissoqqissaarneqartullu tamarmik allannguummik omikronimik tunillatsissimasuusut, akissutit kingulliit takutikkaat, Nakorsaanqarfik nun.gl-imi paasissutissiivoq.
Misissueriaaseq allanngortinneqarpoq, taamaalilluni ikittuinnaat, tassa covid-imik tunillatsinnermi napparsimarululersinnaasut kisimik PCR-imik misissortissinnaalerlutik:
Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.
Tamanna misissuisarfiit napparsimmaviillu malinnaasinnaajunnaarnerannik pissuteqarpoq.
Misissorneqartunit tunillatsissimasut procentinngorlugit januaarimi 60-imiipput.
Nunatsinni tuniluunnerup eqqorluartumik qanoq innera ilisimaneqanngilaq. Napparsimarululersinnaasut kisimik PCR-imik misissortissinnaapput. Allat sinneri angerlarsimallutik peqqissinissartik utaqqissavaat, aamma imminnut peqqissisutut nalunaarutigisassapput.
AAMMA ATUARUK Tamaat isigalugu: Coronavirus pillugu killiffik
Periuseq taanna misissuisarfiit napparsimmaviillu januaarip aallartinnerani tunillatsissimasorpassuaqarnera pissutigalugu angummanneq ajulermata atulerneqarpoq.
Taamaalilluni kikkunnik tamanik misissuisarneq nunatsinni coronamut sakkussaajunnaarpoq. Inuillu PCR-imi misissortittannginnerat, napparsimmaviliartannginnerat pissutigalugu tunillatsissimasorpassuit ilisimaneqanngillat.
Taamaakkaluartorli Aasianni, Nuummi Ilulissanilu tunillatsissimasut amerlanerpaaffissaanneereersut nakorsaanerup, Henrik L. Hansenip nalilerpaa. Illoqarfinni taakkunani pingasuni innuttaasut pingajorarterutaat nalugaqarput.
Napparsimmavinni uninngasut ikiliartortut
Nunarput tamakkerlugu covid-imik tunillatsissimallutik napparsimmavinni uninngasut tallimanngormat 16-iusut ippassaq nalunaaqutaq sisamanut qulingiluanut ikilipput.
Nuummi uninngasut pingasuupput, Aasianni marluk, Nanortalimmi marluk, Sisimiuni ataaseq Qaqortumilu ataaseq.
Covid-19-imik tunillatsissimallutik uninngasunit marluk corona pingaarnertut pissutigaat. Uninngasunit pingajuat covid-19-imik tunillatsissimanera nappaataannut ajoqusernerannulluuniit allamut unitsinneqarneranut pingaarnerusumut sunniuteqarpoq.
Napparsimmavimmi uninngasunit arfinillit coronamik tunillatsissimaneranik pissuteqanngitsumik uninngapput. Taakkulu uninnganeranni corona sunniuteqanngilaq, taamaakkaluartorli naatsorsueqqissaarnermi ilaallutik.
Aqagu nalunaaqutaq ataatsimut coronamut killiffik pillugu tusagassiortunik katersortitsisoqassaaq. Tamanna toqqaannartumik maana knr.gl-ikkut malinnaaffigisinnaavat.
