Coronamut killiffik pillugu tusagassiortunik nalunaaqutaq ataatsimut katersortitsissasut
Nakorsaaneq Henrik L. Hansen, Naalakkersuisut siulittaasuat Múte B. Egede peqqissutsimullu naalakkersuisuugallartoq, Pele Broberg corona pillugu nalunaaqutaq ataatsimut tusagassiortunik katersortitsissapput.
Katersortitsinermi “corona pillugu killiffik” qulequtarineqassaaq.
Tusagassiortunik katersortitsineq knr.gl-ikkut, raadiokkut KNR TV-kkullu malinnaaffigisinnaavat.
Tusagassiortunik sapaatip akunnerata siuliani katersortitsisoqarmat coronapassi nuna tamakkerlugu atorunnaarsinneqarpoq. Qanermulli assiaqut sumiiffinni tamani atorunnaarsinneqanngilaq - taamaallaat Tunumi. Tasiilami, Ittoqqortoormiini tunumilu nunaqarfinni coronapassi qanermullu assiaqut sisamanngornermi atorunnaarsinneqarpoq.
AAMMA ATUARUK Tamaat isigalugu: Coronavirus pillugu killiffik
Nunatta sinnerani neriniartarfinni imerniartarfinnilu isersimasinnaasut affaannaat kisimik suli isersinnaatinneqassapput.
Imigassamik inerteqquteqarneq kommunini pingasuni suli atuuttoq unnugu unnuap-qeqqanut atorunnaassaaq.
Illoqarfinni pingasuni tuniluunneq annikilliartortoq
Nakorsaaneqarfiup Nuummi, Ilulissani Aasiannilu tuniluunneq annikilliartortutut nalilerpaa. Taamaakkaluartorli Sisimiuni, Maniitsumi, Uummannami, Paamiuni nunatta kujataanilu suli tuniluuttoqangaatsiarpoq.
PCR-imik misissukkanit 108-nit 23 proicentiinnaat tunillatsissimasut ippassaq saqqummiunneqarpoq. Tunillatsissimasut procentinngorlugit januaarimiilli 50 procentip missaaniittuartaraluarpoq.
Nunatsinnili tunillatsissimasut qanoq amerlatiginerat ataatsimut ilisimaneqanngilaq.
Napparsimarululertut kisimik PCR-imik misissortissinnaapput. Allallu sinneri angerlarsimaannartussaapput peqqisseqqinnissartillu utaqqillugu - aammattaaq imminnut peqqissisutut nalunaarutigisassapput. Periuseq taanna misissuisarfiit napparsimmaviillu tunillatsissimasorpassuaqarnera pissutigalugu angummanneq ajulermata atulerneqarpoq.
Taamaalilluni kikkunnik tamanik misissuisarneq nunatsinni coronamut sakkussaajunnaarpoq. Inuillu PCR-imi misissortittannginnerat, napparsimmaviliartannginnerat pissutigalugu tunillatsissimasorpassuit ilisimaneqanngillat.
