Coronap aalisarneq pillugu Nuummi Ilulissanilu isumasioqatigiinneq kinguartikkaa

Sisamanngorpat Nuummi aalisarneq pillugu isumasioqatigiittoqartussaagaluarpoq. Aalisarnermut piniarnermullu naalakkersup Aqqaluaq B. Egedep IA-meersup aalisartut aggersarsimavai Aalisarneq pillugu Ataatsimiititaliarsuup innersuussutai oqaloqatigiissutiginiarlugit.  

Kisianni kinguartinneqarpoq. Aamma taamatut 19. januaari Ilulissani aalisarneq pillugu isumasioqatigiinnissaq pivoq.

Iklloqarfiit taakku marluk Kalaallillu Nunaanni sumiiffiit amerlasuut allat annertuumik tunillaasorfiupput.

Sapaatiummat Ilulissani misissortittunit 427-nit  187-t ersiuteqarput, tassalu misissortittut  44 procentii ersiuteqarlutik. Ewrsiuteqartut amerlassusaasa takutippaat Ilulissani tunillaassorneq sukkaqisumik ingerlasoq.

Illoqarfiit pingaarnersaanni Nuummi aatsaat taama amerlatigisunik tunillaatsittoqarpoq, 1.550-t ersiuteqarmata.

Nutaamik ulluliinissamut coronaqarnera utaqqimaarneqassaaq  

Siorna Aalisarneq pillugu Ataatsimiititaliarsuaq aalisarneq pillugu inatsisissamut innersuussutiminnik saqqumiussimmata pissanngatigineqaqaaq.

Avannaanut innersuussutit ilagaat Qeqertarsuup tunuani, Uummannami amma Upernavimmi qaleralinnik pisassiissutit annikillisinneqartariaqartut piffissap ingerlanerani biologit innersuussutaat malilerlugit.

AAMMA ATUARUK Fiskerne i Ilulissat føler sig overset til seminar

Tamatuma kingunerissavaa massakkumut naleqqiullugu affaannanngussasut. Tamanna  - allarpassuillu – isumasioqatigiinnermi oqaluuserineqassapput.

Innersuussutit isumaliutissiissummi 375-nik quppernilimmi allassimapput. Isumasioqatigiinnermi saqqummiunneqarlunilu oqallisigineqassaq nalunaaquttap akunnerini marluinnarni.

Naalakkersuisut tusagassiuutinut nalunaarummi allapput Kalaallit Nunaanni coronaqarnera pitsaanerulerpat aalisarnermut piniarnermullu naalakkersuisoqarfik nalunaarumaartoq aalisarneq pillugu isumasioqatigiinnissat ullulerneqarnissaat piareersarlugu.