Coronapas imaluunniit naami? Nunarput tamakkerlugu killilersuutit aaku

Coronamut tamakkiiisumik akiuussusertissimanermut, tunillatsissimannginnermullu uppernarsaat pillugu nunarput tamaat atuutilersoq pillugu decembarip ulluisa 20-ani nalunaaqutaq 12.42 paasissutissat nutarterput.

Corona uani coronalu uani. Killilersuinerit nutaat uani allanilu atorunnaartut.

Aamma illit malinnaasinnaajunnaarpit? Taamaappat kisimiinngilatit. Nunarput tamakkerlugu corona pillugu malittarisassat tamarmik ataatsimoortillugit aaku:

Illoqarfiit pingasut taakkulu nunaqarfiini maanna killilersuisoqarpoq. Tamatuma saniatigut nunatta iluani nunatsinniit nunatsinnullu angalanermut malittarisassaqarpoq.Nunarput tamakkerlugu coronamut akiuussusertissimanermut uppernarsaammik takutitseqqaartarnissaq piumasaqaataavoq, akiuussusertissimanngikkaannili tunillatsissimannginnermut uppernarsiaammik takutitsisoqaqqaassaaq.

Tamaammat Naalakkersuisut Inatsisartuni partiit siuttuinit allanit taperserneqarlutik malittarisassat uku saqqummiuppaat:

• Tamanit ornigarneqarsinnaasunukarniaraanni coronapassimik takutitsisoqassaaq. Tassa:
• Neriniartarfinni, cafeni, imerniartarfinni, qitigiartarfinni.
• Atuakkanik atorniartarfinni, kulturip illuanni, filmertarfinni, katersugaasivinni saqqummersitsisarfinnilu.
• Katersortarfinni allanillu innuttaasut ataatsimoortarfianni.
• Illup iluani silamilu eqaarsaartarfinni, soorlu timersortarfiit, naluttarfiit, timigissartarfiit arsaatarfiillu.
• Nujaleriffiit, tagiartortittarfiit, allallu assigisaat.
• Pisinarfiit Ulluinnarni pisariaqartitanut pisiniarfiunngitsut.

Pisiniarfinnut allakkerivimmullu isernissamut coronapasimik takutitsisariaqanngilatit.

• Tamatuma saniatigut aqqaneq-marluleereersimasut tamarmik sumiiffinnut ukununngarniarunik qanermut kiinnamulluunniit assiaquteqassapput:
• Tamanit ornigarneqarsinnaasuniikkunik (pisiniarfiit, oqaluffiit, atuakkanik atorniartarfiit, neriniartarfiit ilaalu ilanngullugit).
• Ulluinnarni atugassanik pisiniarfinni kiffartuussivinnilu sulisut atuisunut attaveqartartut suliaminnik isumaginninnerminni.
• Busserunik taxarunillu.

Ilaatinneqanngitsoqarporli, taakku uani atuarsinnaavatit.

Malittarisassat 2022-mi marsip ulluisa arfernanut atuupput.

Qasigiannguani inuit silami illullu iluani amerlanerpaamik 20-oqqusaapput. Taanna decembarip 20-at ilanngullugu atuuppoq.

Assi © : Christine Hyldal/ KNR

Nunatsinni angalasut:

Nunatta iluani angalanermi tamakkiisumik akiuussuserneqarsimanngikkuit tunillatsissimannginnermut uppernarsaammik sivisunerpaamik akunnernik 48-nik pisoqaassusilimmik takutitsisinnaassaatit.

Marlunnik ukioqalereersimasut tamakkiisumik akiuussuserneqanngitsut illoqarfimmiit nunaqarfimmiilluunniit angalanissamut misissorteqqaarsinnaanngikkunik tikiffimminni ulluni 14-ini imaluunniit tunillatsissimannginnerata uppernarsarneqarsinnaalernissaata tungaanut angerlarsimaannartitaassapput.

Tikiffigisami misissortinnissaq periarfissaanngippat ulluni 14-ini angerlarsimaannartoqassaaq.

Inuit angerlarsimaannartussaatitaasut aaqqissuussinernut katerinnernulluunniit peqataaqqusaanngillat. Taakkuli ulluinnarni atortussanik pisiniarfinnut qanermut kiinnamulluunniit assiaquteqarlutik pisariaqartitaminnik pisiarnissaapput.

Nunatsinnut nunatsinniillu angalasut

Nunatsinni najugaqaruit – angerlariartorlutillu – mittarfimmi coronapasit takutissavat. Aamma tunillatsissimannginnermut uppernarsaat sivisunerpaamik akunnernik 48-nik pisoqaassusilik takutissavat.

Tamakkiisumik akiuussuserneqarsimanngikkuit tunillatsissimannginnermut uppernarsaammik sivisunerpaamik akunnernik 48-nik pisoqaassuseqartumik takutitsissaatit.

Nunatsinni najugaqanngikkuit

Angalasut tamarmik aqqaneq-marluleereersimasut nunatsinnilu najugaqanngitsut, nunatsinnukarniarunik covid-19-imik akiuussutissamik tamakkiisumik kapitissimanerminnik uppernarsaateqassapput aamma PCR-imik misisisortinneq sivisunerpaamik akunnernik 48-nik pisoqaassuseqartumik takutitsissapput.

Air Greenlandimi aamma nun.gl-imi annerusumik atuagaqarsinnaavutit.