Silarlunnera ukiuuneranilu taarnera Upernaviup nunaqarfiinut allakkanik kinguaattoortitsisut

Upernavimmiit nunaqarfinnut juulli sioqqullugu allakkanik, poortukkanik nassiussanillu allanik qulimiguulimmik assartuineq kinguaattoorfiuvoq, Air Greenlandip taavani qulimiguuliata timmisartuussisarneri kaperlammit silarlummillu piffissami sivitsortumi akornusersorneqarmata.

AAMMA ATUARUK Air Greenlandip avannaani tunumilu qulimiguulimmik angallassinerit pitsanngorsarniarai

Upernaviup nunaqarfiinut nassiussanik assartuinermi kinguaattuungaatsiarnertik Air Greenlandip avammut paasissutissiisartuata Inga Dora G. Markussenip nassuiarpaa:

- Piffissami sivitsortumi timmisartuussinerput Upernaviup nunaqarfiinut sillamit akornuteqarsimavoq. Isikkivilunneq taavalu piffissakitsuaqqap iluani timmisinnaanerput killeqarami, kaperlannera pissutigalugu. Tassuuna Upernaviup nunaqarfittaanut angallassinerit eqqugaangaatsiarsimapput.

Poortukkat nassiunneqangajalersut

Upernaviup nunaqarfiinut qulimiguulimmik juulli sioqqullugu timmisartuussinerni ilaasussat salliutinneqarsimapput, taamaattumillu allakkat, poortukkat nassiussallu kinguaattuungaatsiarput. 

Tasiusamut, Aappilattumut Kangersuatsiamullu nassiussassat tamarmik maanna apuutereerput, nunaqarfiillu sinnerinut nassiussanik qulimiguulimmik assartuineq tullinnguuppoq.

- Taava massakkut suli poortugassiassaqarput Nuussuaq, Kullorsuaq, Innaarsuit aamma Upernavik Kujalleq. Taakkulu uuma sapaatip akunnerata naannginnerani apuunnissai naatsorsuutigivarput. Silagippasittussaammat aamma immikkut ittumik timmisartuussinernik ikkussinikuugatta, taakkua suliariniarlugit.

Inga Dora G. Markussen, Air Greenlandip paasissutissiisarfianit taama ilisimatitsivoq.