Danmark: Corona peqqinnissaqarfiup ajornartoorneranut ersiutaaginnarpoq
Coronap nalaani ajornartoorneq tassaaginnarpoq siunissami peqqinnissaqarfiup tatineqarnerup sulisussaaleqinerullu tungaatigut annertoqisumik siunissami ukiorpassuarni ajornartorsiornissaanut takussutissaasoq.
Sisamanngormat Danmarkip Immikkoortuisa ukiuni pingasuni siullermik takkullutik ataatsimeersuarnerani siulittaasoq Stephanie Lose (V) erseqqissaavoq.
- Napparsimmaviit coronaqarnerani, suliumajunnaarnermik tassanngaannarlu napparsimalersunik assut tamaviaartitaasimapput, pingaartumik sulisussaaleqigatta.
- Ajoraluartumik unammilligassanut pisussanut takussutissaaginnarpoq, qinigaaffimmut tullermut immaqalu siunissami qinigaaffinnut amerlasuunut atuuttussanut, Lose oqarpoq.
Danskillu naalakkersuisui peqqinnissaqarfimmik aaqqissuusseqqinnermik nutaamik saqqummiigaluartut, napparsimasunut sinaakkutissat nutaat pitsaanerusullu pillugit napparsimmavinnillu tatisimaneqarnerpaanit aallanut nuussinikkut, taamaattoq kisitsisitigut paasissutissat erseqqilluinnarput.
Danskit affangajaat ukiut tamaasa timikkut napparsimallutik peqqinnissaqarfimmik attaveqartarput – taavalu tarnikkut nappaateqarnerit taanngilavulluuniit.
Ukiuni 2009-2018 napparsimmavinni timikkut napparsimallutik saffiginnittut nutaat inuit 2.510.000-imiit 2.840.000-imut ukiumut amerleriarput.
Piffissami tassani napparsimmavinni uninngasut 10.530.000-imiit 13.770.000-imut amerliarput. Amerleriarnerit 13 aamma 31 procentiupput.
- Neriuppugut Folketingip paasissagaa pisariaqarluinnartoq ilaatigut teknologimik passussinermik isumaginninnermillu, sulisut pikkorissut kisimik isumagisinnaasaannut piffissaqarnerulernissannut atorneqartussamik aningaasaliinissani.
