Danmark Pakistanimut qarsutsisimasumut 10 millionit koruuninik tunniussisoq

Danmark Pakistanimi qarsutsinersuarnik eqqugaaqqasumi ikiuniaqatigiiffinnut 10 millionit koruunik nassiussivoq.

Aningaasat taakku Naalagaaffit Peqatigiit ikiuniaqatigiiffiannut, tassa UNHCER-imut tunniunneqassapput.

Nunanut allanut tunngasunut ministereqarfik tusagassiuutinut nalunaaruteqarluni taama paasissutissiivoq.

- Qarsutsinerit sanngiinnerpaat silap pissusiata allanngoriartorneranit eqqugaanerpaasarneranut takussutissaapput.

- Danmarkip silap pissusianut atatillugu nunarsuarmi tamarmi suliniutinut tapersuiinnassaaq, UNHCR-illu Pakistanimi ikiueqqaarneranut tapiissuteqarpugut, nunanut allanut tunngasunut ministeri, Flemming Møller Mortensen tusagassiuutinut nalunaarummi allappoq.

Naalagaaffiit Peqatigiit aamma Pakistanimi naalakkersuisut taakkua ataatsimoorlutik nunarsuarmiunut kajumissaaruteqarput ikiuuteqqullugit.

Taakkua Pakistanimi ajunaarnersuarmik eqqugaanerpaanut atorneqartussanik 160 millionit dollasinik tassa danskit koruuninngorlugit 1,2 milliardit koruuninik qinnuteqarput.

Pakistanip qarsutsineqarnera nuna tamakkerlugu ajornartoornerunerarpaa.

Juunip aallartinerani sialussuaarnerata kingorna Pakistanimi ukiuni qulikkaani kingullerni aatsaat taama ajortigisumik kinguneqartumik qarsutsinersuaqarpoq.

AAMMA ATUARUK Danmark Afghanistanimiunut ikiuutissanik 100 millionit koruuninik tapiisoq

Inuit 1100-init amerlanerusut toqupput. Taakkunannga 400-it missaanniittut meeraapput.

Naalagaaffiit Peqatigiit oqarnerat naapertorlugu Pakistanimi innuttaasunit 220 millioninit 33 millionit eqqugaapput.

Eqqugaasunit 33 millioninit 16 millionit missaanniittut meeraasut, Unicef naliliivoq.

Naalagaaffiit Peqatigiit Meeqqat pillugit suliniaqatigiiffiata meeqqat 3 millioninit amerlanerusut ikiuiniarnermik pisariaqartitsisut tusagassiuutinut nalunaarutigaa.

Taakku qarsutsisoqarnera pissutigalugu imaanit aallaaveqartumik napparsimalernissamut, ipinissamut imaluunniit peqqinnanngitsumik nerisaqarnissamut aarlerinartumiipput.

- Ajunaarnersuaqartillugu meeqqat eqqugaaqqajaanerpaat ilaanniittarput.

- Qarsutsinerit meeqqanut ilaqutariinnullu aamma pissutsinut ajornerulersitsillutik aserorterinermik nassataqarput, Unicefip Pakistanimi sunniisua, Abdullah Fadil oqarpoq.

Erngup katersuuffigisai aqqusinernik, naatitanut ikaartarfinnullu ilaatigut aserorteripput.

Nunanut allanut tunngasunut ministereqarfiup oqarnera naapertorlugu UNHCR pinasuartumik ikiueqqaarpoq. Tamanna tupernernik, ulissuarnik, qipinnik siniffissamullu allianik ilaatigut ikiuineruvoq.