Danmarkimi malittarisassat nutaat kingunerannik coronapas-i nutaanngilivoq

Uagut Kalaallit Nunaanniittut qaammatit arlallit qaangiummata aappassaanik akiuussutissamik kapitippugut.

Ullunilu makkunani peqqinnissaqarfik, nunarpassuit allat assigalugit, booster-imik kapisinermik taaneqartumik akiuussummik kapisissalluni  neqerooruteqaleruttorpoq.

Ilaannulli assigiinngitsunik peqquteqarlutik pingajussaanik kapitissimanngitsunut coronapas-i atuukkunnaarsimasutut ersersinnaavoq.

Danmarkimimi coronapas-ip atuuffiata sivisussusaanut malittarisassat allangortinneqarput.

Folketingimi Epidemiudvalgi sapaatip akunnerani siuliani aalajangerput pingajussaanik kapitissimanngitsunut coronapas-ip  atuunnerata sivisussusaa qaammatinut tallimanut sivikilliniarlugu.

Taamaattumik oqarasuaatinni angallattakkami coronapas app-inni ersersinnaavoq atuukkunnaartoq.

Maani Kalaallit Nunaanni Danmarkimisulli atuunnera sivikillineqanngilaq, kisianni danskit coronapas-app-erimmassuk imaassinnaavoq atuukkunnaarsimasutut ersertoq.  

Coronapas-it danskiusoq atuukkunnaarsimappat app-imi EU-Coronapas-imut nuussinnaavutit. EU-Coronapas-imi isumaminik atuukkunnaarneq ajorpoq. Aamma app-imi kapitinnerpit qupperneranut nuussinnaavutit. Kalaallit Nunaanni akiuussutissamik kapitinnerit marlunnit amerlanerunngitsut tamanit tikinneqarsinnaasunut soorlu neriniartarfinnut aamma cafénut isernissannut piumasaqaataapput.

Nakorsaaneqarfik nittartakkamini taama allappoq.

Kalaallit Nunaanni coronapas-i massakkut ullormik atuukkunnaarfeqanngilaq.