Noorlaanut Folketingimut qinersinissamut najoqqutassaaq
Danmarkimiit noorlaatut Kalaallit Nunaanni politikkikkut qanoq aalajangeeqataasinnaatiginerluni nalornisiginarsinnaavoq.
Tamannalu ingammik qinerseqqajaanermi nalornisigeqqeriaannarsinnaavoq.
Taamaammat danskisut innuttaassusilinni nunami allami, soorlu nunatsinni, najugallit qineqqusaartunik partiinillu sorlernik qanoq qinersisinnaatitanerannik malittarisassat pillugit allaatiginnippugut.
Danmarkimiit noorlaatut qanoq qinersisinnaatitaaninnik paasissutissat
- Nunamut allamut nuunnerminniit ukiut marluk qaangiutsinnagit Danmarkimut utissangasut.
- Naalagaaffimmi atorfilittut Kalaallit Nunaannut suliartortitat.
Aamma Kalaallit Nunaanni najugaqarallartut (tassa najugaqavilissanganngitsut Kalaallit Nunaanniluunniit ukiut arfineq-pingasut sinnernagit najugaqassangasut):
- Danskit oqartussaasuinit taakkuluunniit suliffeqarfiutaannit taavalu namminersortut suliffeqarfiutaannit peqatigiiffiannilluunniit aallartitat.
- Nunat tamalaat Danmarkip ilaasortaaffigisaani kattuffissuaneersut (soorlu naalagaaffiit Danmarkip ilaasortaaffigisaani kattuffianneersut).
- Danmarkip ikiuiniaqatigiiffianeersut.
- Ilinniariartorlutik Kalaallit Nunaanniittut.
- Peqqissuseq pissutigalugu Kalaallit Nunaanniittut.
- Aamma Danmarkimut attuumassuteqarlutik allamilli peqquteqarlutik Kalaallit Nunaanniittut.
Noorlaatut nunatsinni ulluni 18-init ikinnerunngitsuni najugaqalereersimaleruit, nunatsinni qineqqusaartunik partiinilluunniit Folketingimut novembarip aallaqqaataani qinersisinnaatitaavutit.
Danskisulli innuttaassuseqarlutit nunatsinni aalajangersimasumik najugaqaruit, Danmarkimi qineqqusaartunik partiinilluunniit qinersisinnaatitaanngilatit.
Taamali pisariutiginngilaq.
Danskisummi innuttaassuseqarlutit Kalaallit Nunaanni aalajangersimasumik najugaqaraluarlutit, nunami avannarlermi allami peqquteqavissumik najugalittut Danmarkimi qineqqusaartunik partiinilluunniit qinersisinnaatitaasutut nalunaarsoqqaguit, Danmarkimi qineqqusaartumik partiimilluunniit qinersisinnaatitaavutit.
Taamaaliorsinnaatitaajumaguilli Kalaallit Nunaanni najugaqaraluarlutit Danmarkimi aalajangersimasumik suli najugalittut nalunaarsoqqasuunissat piumasaqaataavoq.
Nunamimi avannarlermi allami peqquteqavissumik najugalittut Danmarkimi qineqqusaartunik partiinilluunniit qinersisinnaatitaasutut nalunaarsoqqanngikkuit, qinnuteqaatit qinersitinnata suliarineqarsinnaanngilaq.
Tassa Danmarkimi qineqqusaartunik partiinilluunniit qinersinissat angumerisinnaanngilat.
Taamaaliornissamilli misilillugu qinnuteqaraluarsinnaavutit. Qinnuteqaatimmi akuerineqassappat, Danmarkimi qinersinissani taasinissanilu Europamilu Inatsisartunut qinersinissani peqataasinnaalissaatit.
Nunami avannarlermi allami peqquteqavissumik najugalittut Danmarkimi qineqqusaartunik partiinilluunniit qinersisinnaatitaasutut nalunaarsortinniaruit qinnuteqarfissaq una immersoriarlugu København Kommunemut allakkatigut e-mailikkulluunniit nassiutissavat.
Ima qinersiartussaatit
Kalaallit Nunaanni qineqqusaartunik partiinilluunniit qinersiniaruit, najukkavit kommuniata qinersivianukarlutit qinersiartuinnassaatit. Qinersivimmukarnissannut periarfissaqanngikkuit, najukkavit kommunianukarlutit allakkatigut qinersisinnaavutit.
Nunamili avannarlermi allami peqquteqavissumik najugalittut Danmarkimi qineqqusaartunik partiinilluunniit qinersisinnaatitaasutut nalunaarsoqqaguit Danmarkimilu qineqqusaartunik partiinilluunniit qinersiniaruit, allakkatigut taamaallaat qinersisinnaavutit. Najukkavit kommunianukarlutit taamaaliorsinnaavutit.
Kommunerisanniinnalli, soorlu silasiorfimmiikkuit timmisartoqarfimmiikkuilluunniit, allakkatigut qinersisinnaavutit. Kalaallit Nunaannilu Danmarkimiluunniit qineqqusaartunik partiinilluunniit qinersiniarnersutit tamatumani apeqqutaanngilaq.
Kalaallit Nunaanni qineqqusaartut, partiit taakkulu qineqqusaarutaat
Kalaallit Nunaanni partiit qinigassanngortitaqartut tallimaapput, qineqqusaartut 15-iupput. Taakkulu qineqqusaarutaat Kalaallit Nunaata siunissagissaarnerulernissaanut tunngasut amerlapput.
Kalaallit Nunaanni qineqqusaartut partiillu qinigassanngortitaqartut pillugit paasisaqarnerorusukkuit allaatigisaq Nunatsinniit Folketingimut sassartut atuarsinnaavat.
Kalaallit Nunaannilu partiit taakkulu qineqqusaarutaat pillugit paasisaqarnerorusukkuit allaatigisaq Nunatsinni partiit Folketingimut qineqqusaarnermi pingaartitaat makkuupput atuarsinnaavat.
