Danskit peqqinnissaqarfitsinnut neriorsuuteqannginnerat partiinit naammagineqanngilaq
Naqqiut: Allaaserisami siullermi allaqqavoq Anna Wangenheim Demokraatit siulittaasorigaat. Tamannali aaqqinneqarpoq.
Danskit nutaamik ippassaq naalakkersuisoqatigiiliorput. Naalakkersuisoqatigiilersut nutaat tassaapput Socialdemokratit, Venstre Moderaternelu.
Naalakkersuisoqatigiinngortut naalagaaffeqatigiinnerup iluani, tassa Savalimmiuni nunatsinnilu aalajangigassanik aalajangiissatillutik tamatigut nunat taakku ilaatinneqartassasut oqaatigeqqippaat.
Taamaakkaluartoq naalakkesuisoqatigiilersut nunatsinni partiini siulittaasunit ilaatigut aamma naammagisimaarneqanngillat.
- Talerperliit siuttunngornissaat neriuutiginikuugaluarpara, kisianni tassa allatut ajornartumik taamaanngilaq, toqqaannartumik pakatsilaarpunga. Talerperliit naalakkersuisoqataalernerat pakatsinarpoq, Atassut siulittaasuat Aqqalu Jerimiassen oqarpoq.
Peqqinnissaqarfimmut ikiorsiisoqarnianngitsoq
Nunatsinni qineqqusaarnerup nalaani peqqinnissaqarfik eqqartorneqangaatsiarpoq. Taamaattorli naalakkersuisoqatigiinnissamik tunngaviusussami naalagaaffeqatigiinneq pillugu tunngasut quppernerit marluk, taakkunaniluunniit eqqaaneqanngimmat.
Naalakkersuisoqatigiilersussat nunarput pillugu pilersaarutaasa ilaat ukuupput:
- Naalagaaffiup nunatsinni suliassaqarfii nunatsinnit akisussaaffigineqalissanersut taamaattoqassappallu taakku qanoq pissanersut pillugit nalunaarusiorneq, assersuutigalugu inuussutissanut nunatsinnilu suliassaqarfiinut allanut tunngasuni.
- Kalaallit Nunaata politiivinut tunngasuni ineriartortitsiinnarnissamik ataavartumik nalilersuineq.
- Issittumi Atlantikullu Avannaani silap pissusianik imartaannillu ilisimatusarnernik attassineq.
- Naalagaaffeqatigiinnermi sutigut tamatigut ilisarisimasaqatigiinnissamik paaseqatigiinnissamillu nukittorsaaneq, soorlu ilinniartitaanikkut kulturikkullu suliniuteqarnikkut.
- Ministereqarfiit tamarmik susassaqarfitik misissussavaat nunatsinnilu susassaqarfimminni soorlu inatsisilerinermut assigisaannullu tunngasuni qanoq isumannaagassaqartigineranik qulaajaaneq. Naalakkersuisullu suleqatigalugit tamanna pilersaarusioqqissaarusuppaat.
- Naalakkersuisoqatigiilersussat Savalimmiuni Kalaallit Nunaannilu Naalakkersuisut naalagaaffeqatigiinnermi killeqarfitsigut aporfeqarunnaarnissamut suliniutigisaminni suleqatigerusuppaat.
.
Allaqqasorli tassaavoq kikkulluunniit piartortunik sulinngiffeqarlutik nunatsinnut Savalimmiunullu paaqqutarinnikkiartorsinnaalernissaat naalakkersuisoqatigiilersussat misissussagaat.
Tamanna nunatsinnit naammagineqanngilaq.
Atassutip qineqqusaarnerani nunatsinni peqqinnissaqarfik 1992-imiilli oqartussaaffigineqalernikup, oqartussaaffigineqarnera Danmarkimut utertinneqarnissaa qineqqusaarutigaa. Naalakkersuisoqatigiilersunilli immikkut isiginiarneqanngimmat partiip siulittaasuata pakatsissutigeqaa.
- Qineqqusaarneq tamaat pingaarnertut eqqartorneqarpoq. Danskit partiivi tamakkingajallugit aamma peqqinnissaqarfiup iliuuseqarfigineqarnissaanik oqariartuuteqaqataanikuupput, taamaammat ataasinnguamilluunniit eqqaaneqannginnera eqqumeeqaaq.
- Pakatsinarpoq, tassami nunatsinni innuttaasut atorfissaqartippaat. Taamaammat oqarluaannarsinnaavugut ukiut sisamat tulliuttut susoqassanersoq naluarput, Aqqalu Jerimiassen oqarpoq.
Naalakkersuisoqatigiilersulli nunatsinnut ikiuerusussuseqarnissaannik taanna nerisuuteqarpoq.
- Neriuppunga sapinngisamik naalakkersuisut nunatsinninngaanniit taakku iliuuseqarfigineqarumaartut aalajangiussassatulluunniit siunnersuutitut imaluunniit inatsisartut siunnersuummi arlaannik danskit naalagaaffianut saaffiginnittoqarnissaanik. Tassami ukua talerperliit taavalu socialdemokratit eqqarsaatigissagaanni nunatsinni peqqinnissaqarfiup arlaatigut kivinneqarnissaanut ikiuussinnaanissaminnut ammallutik oqariartuuteqarnikuummata, allaat tamakku qineqqusaarutiginikuuai taamaammat nunatsinninngaanniit oqariartortoqarpat minnerpaamik tusarnaarsinnaajumaartut.
Demokraatit aamma pakatsisut
Danmarkip peqqinnissaqarfianik aaqqissuusseqqinneq
Danskit peqqinnissaqarfiata ilusissaanik nutaanik ataatsimiititaliartaaq siunnersuuteqassaaq.
Danmarkimi napparsimmaviit, kommunit nakorsallu nammineq nakorsiartarfiutillit qanimut suleqatigiinnerussasut naalakkersuisoqatigiit ataatsimiititaliarsuarmut piumasaraat.
Peqqinnissaqarfimmi sulisut qanoq amerlineqassanersut qanorlu atorfimmiinniiginnartinneqarsinnaanersut ataatsimiititaliarsuaq aamma siunnersuuteqassaaq.
Napparsimasut Danmarkimi sumiluunniit najugaqarnerat apeqqutaanani assigiiaarnerusumik nakorsartinneqartalissapput.
Ataatsimiititaliarsuaq apriilip aallaqqaataa 2023 nallertinnagu pilersinneqariissaaq peqqinnissaqarfiullu nutaamik aaqqissuussaatut ilusissaanik siunnersuummik upernaakkuut 2024-mi tunniussissaaq.
Peqqinnissaqarfimmi allannguutissat Folketingimi ilaasortaq folketingip ukiuani 2024/25-mi akuersissutigissavaat.
Peqqinnissaqarfik pillugu tamanit peqataaffigineqartumik oqallittoqassasoq naalakkersuisoqatigiit aamma kissaatigaat.
Danskit napparsimmaviini, timitat, teknikkimut digitalimullu tunngasut aserfallatsaalinissaannut aningaasaateqarfimmik naalakkersuisoqatigiit aamma pilersitserusupput.
Tusarfik: Naalakkersuisoqatigiit tunngaviat "Ansvar for Danmark 2022".
Peqqinnissaqarfiup ukkatarineqannginnera Demokraatinittaaq aamma naamaagisimaarneqanngilluinnarpoq.
- Naqitannguamik ataasinnguamilluunniit eqqaaneqanngimmat pakatsinartorujussuuvoq. Qineqqusaarnermi annertuumik initunikuuvoq, partiinillu tamaginni kissaatigineqarluni, qallunaat nunaanni suleqataaffigineqarsinnaasut peqqinnissaqarfik peqatigalugu kisianni aamma nunanut allanut suleqatissarsiornissap aammaanneqarnissaa isumaqatigiiffigineqarpasimmat. Taamaammat pakatsinartorujussuuvoq innuttaasut pisariaqartitaat aallaavigalugu, peqqinnissaqarfik pillugu naqitamik ataatsimilluunniit allassimasoqanngimmat, Demokraatiniit Anna Wangenheim oqarpoq.
AAMMA ATUARUK Danmarkimi ministerinngortut nutaat ilisaritinneqartut
Ilaatigut Danmarkimi napparsimmaveqarfiit pitsaanersumik suleqatigiittoqalernissaanik ikiorsiisoqassaaq.
Peqqqinnissaqarfimmut sulisunik amerlanersunik qanoq pissarsisoqarsinnaanersoq maanna ataatsimiititaliamit innersuutigineqassaaq.
