Demokraatit tunuarnermik kingorna: Suleqatigiinniiginnarsinnagaluarpugut – kisianni Charlotte Ludvigsen-ertaqarnata

Demokraatit massakkut kisimiillutik Kommuneqarfik Sermersuumi sulissapput.

Partii kommunalbestyrelsemilu politikerii marluk Inuit Ataqatigiinnik aamma Nalerqqamik suleqateqarnertik taamaatippaat. Kingulliillu marluk massakkut suleqatigiinnissamik Demkokraatertaqanngitsumik atsiorput.

Kommuneqarfik Sermersuumi suleqatigiilluni ingerlatsineq imaappoq

Suleqatigiilersut tassaapput Inuit Ataqatigiit aamma Naleraq. 

Inuit Ataqatigiit qulingiluanik ilaasortaatitaqarput.

Naleraq marlunnik. 

Suleqatigiit katillugit 11-nik ilaasortaatitaqarput. 

Siumut massakkullu aamma Demokraatit illuatungiliuttuupput katillutillu arfineq pingasunik ilaasortaatitaqarlutik.

Kommunalbestyrelse 19-inik ilaasortaqarpoq.  

Isumaqatigiissut nutaaq Demokraatinut tupaallannartuunngilaq, taakkumi novembarimi suleqatigisaminnut sakkortuumik piumasaqarput: Borgmesteri tunuarli imaluunniit uagut tunuassaagut.

- Nalunaareerpugummi borgmesteriusoq Charlotte Ludvigsen suleqatigiumanagu. Akunnerminni borgmesterimik allamik toqqaasinnagaluarput. Taamaakkaluarpat suleqatigiinniiginnarsimassagaluarpugut, Demokraatit Kommuneqarfik Sermersuumi gruppeformandiat Justus Hansen oqarpoq.

Suliat marluk naammatsissutaapput 

Partiip borgmesterimik tatiginnikkunnaarneranik peqqutitut suliat marluk tikkuarpai.  

Siorna aasakkut Charlotte Ludvigsen coronamut akiuussutissamik kapitinniarlutik utaqqisut qaangiinnarlugit kapitippoq.

Aamma allakkat uppernarsaatit koruuninik 20 milliuuninik nalilik atsiorpai politikikkut suliarineqanngitsut.

- Suleqatgiinnermi taamaattut Demokraatit akuerisinnaanngilaat, Justus Hansen oqarpoq. 

AAMMA ATUARUK Demokraatit borgmesteri tunuartikkusuppaat - taamaanngippat namminneq tunuassapput

Erseqqissarpaa Demokraatit suleqataasunik Inuit Ataqatigiinnik aamma Naleqqamik suleqatignnilluartut.

Tatiginninnginneq taamaallaat Charlotte Ludvigsen-imut tunngavoq.

- Allamik borgmesteriusinnaasumik tikkuaasinnaannginneq uggornaqaaq. Taamaakkaluarpammi siamasissumik suleqatigiittoqarsinnaagaluarpoq, Justus Hansen oqarpoq.

Demokraatit kisimilllutik ingerlaqqipput 

Demokraatit massakkut illoqarfiit pingaarnersaanni kisimiillutik illuatungiliuttutut sulilerput.  

Justus Hansenip nalunaarutigaa illuatungiluttut aappaat Siumut pisortatigoortumik suleqatigissanagu. Aamma teknikkikkut suleqatigiinnik ingerlatsisunik suleqatigiissanngillat.

- Tunuavippugut, ataatsimiititaliani teknikkikkut suleqatigiinnssamut ilaassanngilagut. Taamaakkaluarpammi suli taanna tapersersussavarput (Charlotte Ludvigsen, aaqq.), taamaaliorusunngilagullu.

Demokraatit peermata kommunalbestyrelseni qinikkatut issiasinnaatitaasuni 19-iusuni, IA Nalerarlu kommunalbestyrelsemi aqqanilinnik issiatitaqalerput.