Demokratit senatimi amerlanerussuteqalersinnaasut

Mark Kelly, demokratineersoq, senatimut USA-mi naalagaaffimmi Arizonami  qinersisoqarnerani unammillertimut, republikanerineersumut Blake Mastersimut ajugaavoq, demokratinilu parteeqataata Catherine Cortez Mastop, senatimut Nevadami qinersisoqarnerani unammillertiminut Adam Laxaltimut, republikaneriusumut, qanilliartupiloornera pissutaalluni demokratit senatimi amerlanerussuteqaleratarsinnaapput.

Naalagaaffimmi Nevadami taasinerit 94 procentii arfininngornerup ullaap tungaani kisisinneqareerneranni Adam Laxalt 48,5 procentinit taaguunneqarsimavoq, Catherine Cortez Mastolu 48,4 procentinit taaguunneqarsimalluni. Nutaarsiassaqartitsivik CNN taama allaaserisaqarpoq.

Taasinerilli tuusintilikkaat, Nevadami qinersivinni demokrateqarfiunerusuneersut suli kisinneqarsimanngillat.

Kellyp Arizonami ajugaanerata kingunerisaanik demokratit senatimi 49-nik ilaasortaatitaqalerput, republikanerillu 49-nik ilaasortaatitaqalersussutat isikkoqarlutik.

Naalagaaffinni Nevadami Georgiamilu inernerit suli utaqqimaarneqarput. Demokratit tassani ataasinnarmik pissarsisariaqassapput 50-inik ilaasortaatitaqalerniarunik. Præsidentip tullersortaa senatimi taasinerni naligiittoqaraangat aalajangiisuusarpoq, præsidentillu tullersortaa tassaammat Kamala Harris, demokratineersoq, demokratit senatimi amerlanerussuteqalertarput.

Georgiami senatimut qinersinermi demokratineersoq Raphael Warnock, republikanerineersorlu Herschel Walker illuatungeriipput.

Tassanilu qinigassanngortittut arlaannaataluunniiit 50 procentinit amerlaneusuniilluunniit taaguunneqanngimmat, aappasaanik qinersisoqartariaqassaaq, senatimullu ilaasnrtanngortussaq tassani nassaarineqassalluni. Georgaimi decembarip ulluisa arfernanni qinersisoqaqqittussaavoq.