DMI: Nuummi ulussaarsuartut sakkortutigisumik anorersuartoq

Nuuk anorersuarpoq. Kitaaniit Maniitsumiit kujammut ullaap tungaani anoraa sakkortulluni.

Nuummi anoraa sakkortunerpaaffissaminiippoq. DMI-mi Nuummi immikkoortortaqarfiani silasiortoq, Steen Hermansen KNR-imut oqarpoq.

- Anoraa uuttortaratsigu natsimaneq anorersuannguuttartoq sekundimut 30-31miiteri angussarpaa, taanna oqarpoq.

- Tassa maannakkorpiaq sakkortunerpaaffissaminiippoq (nalunaaqutaq 10:38, aaqq.). Anoraa ualinerani sakkukilliimissaaq sekundtimut 14-15 miiterit angulugit natsimalissalluni.

Anorersuaq kujasimmiit ulussaarsuartut sakkortutigisoq arfineq marlunnik kiassuseqarmat aput aamma aatsippaa.

Maniitsoq Nuummitulli anoraasuartiginngilaq. Tamaani sekundtimut 20 miiterit angullugit sakkortussusilimmik anorlerpoq.

Paamiuni anorip sakkortunerpaaffiani sekunditmut 10-12 miiterisut sakkortussuseqarpoq.

Sarfaq Ittuk oqquisoq

Umiarsuaq ilaasartaat Sarfaq Ittuk ullaap tungaani Nuup kangerluani oqquisimaarpoq. Ilaasartaat ullaaq arfineq pingasut qeqqanut Nuummut tulattussaagaluarpoq, anorersuarluni mallerpallaarmat Nuup kangerluata saani oqquiartorpoq.

Ilaasut 110-t missaanniittut, Arctic Umiaq Linemi suleqatigiinnik aqutsisoq, Erna Møller KNR-imut oqarpoq.

Air Greenland angallassiniarnermigut aamma ajornartorsiorpoq. Timmisartortitseqatigiiffik ukioq manna silarlummik putsumillu angallassiniarnermigut ilungersornartorsiungaatsiarpoq – taakku ullumi aqagulu aamma angallassisinnaanngillat.

Nuummi, Maniitsumi Paamiunilu angalaassinerit tamarmik unitsinneqarput.