DR-mi suliumajunnaartoqarmat ajornartoornermi aallakaatitsisoqartariaqalersoq

DR-mi suliumajunnaartoqarnera pissutigalugu ajornartoornermi aallakaatitsinissamut pilersaarusiorpoq.

DR´p pisortaanera Maria Rørbye Rønn allakkatigut taama ullumi marlunngornermi nalunaarpoq.

Ullumimi marlunngornermi DR-mi immikkoortortaqarfinni arlalinni soraarsitsisoqaqattaarnera pillugu akerliunermik takutitsiniarlutik sulinermik unitsitsisoqarpoq.

- DR-mi sulinermik unitsitsisoqarmat ajornartoornermi aallakaatitsinissamut pilersaarusiortariaqalerpugut, neriuppugulli sukkanerpaamik nalinginnaasumik aallakaatitseqqissinnaalerumaarluta, Rørbye Rønn allakkatigut taama nalunaarpoq.

Matumanili aallakaatitat sorpiaat erseqqissumik oqaatigineqanngillat.

DR-mi sulisut katillugit 47-t ullumi marlunngornermi soraarsinneqarnerminnik paasitinneqarput.

DR-milu suleqatigiikkuutaat ataatsimoorussaminnik soraarsitsineq pillugu qisuariarlutik allagaqarput.

- Aqutsisunut tatiginninnerput sakkortuumik innarlerneqarpoq, taamatuttaaq suliffeqarfiup siunissaa matumani innarlerneqarpoq, suleqatigiillutik akerliusut taama allassimasut, aviisi Politiken allaaserinnippoq.

Maria Rørbye Rønnilli allakkiamini ulloq DR-mi sakkortunerarpaa, qisuariartoqarneralu paasisinnaanerarlugu.

- Aallakaatitsisarnitta qarasaasiatigoornerulernissaannik pilersaarutitta DR allanngornerujussuarmik allanngortiterinernillu – aamma atorfinnik atorunnaarsitsinernik soraarsitsinernillu kinguneqarnissaa  qaqugukkulluunniit toqqorterniarsimanngilarput, pisortaq taama allappoq.

- Taama oqariarlunga, isiginnaartartutsinnummi tuttussaq pingaarnerutittussaavarput, taanna oqarpoq.

Tusagassiorfik Journalisten naapertorlugu P1 Debat pilersaarutit malillugit 12.15 aallakaatinneqartaraluartoq aallakaatinneqanngitsoorpoq, taamatuttaaq Kulturen marluniit sisamat tungaanut aallakaatinneqartartoq aallakaatinneqanngilaq.
Tusagassiorfik Journalisten naapertorlugu sulinermik unitsitsineq aqagu pingasunngornerup ullaavata tungaanut ingerlavoq, aqagulu sulisut suliartoqqissapput.

Ilisimaneqanngilarli sulisut qasserpiaat suliaminnik unitsitsisimanersut.

DR-mi arlalitsigut allannguisoqarmat soraarsitsiortortoqarpoq, matumani digitaliseriinikkut sukaterisoqarnera qitiuvoq.

Soorlu ilaatigut aallakaatitassiaq "Deadline" flow-tv-tut siunissami aallakaatinneqartarnera annikillineqassaaq. Deadline nutaaliaanerusunngorlugu digitaliserikkatut siunissami saqqummertalissaaq.