Politiit Tasiilami toqutsineq pillugu: Toqutaasoq angutaavoq aqqali naluarput

Kalaallit Nunaanni Politit Tasiilami angummik toqutsisimasutut pasisaqarlutik marlunngornerup unnukkuani tigusarinnipput.

Politiit suliamut atatillugu tusagassiortunut sivikitsumik katersortitsipput, tassanilu toqutaasup kinaanera suli ilisimanagu nassuiaatigaat.

- Najukkami Naasuliartarpimmut Tasiilami inummik toqungasumik nassaarsimavugut. Toqutaasoq angutaavoq, kisiannili suli kinaassusersinngilarput taamaattumillu qanigisaasut suli kalerrinneqanngillat. 

Suliami misissuisut aqutsisuat, Malik Sandgreen oqarpoq.

Kalaallit Nunaanni Politiit pinerlussimasorineqartumik tigusarinnipput, misissueqqissaarnerullu innuttaasut ernumassutissaqannginneranik takussuseraa, politiit oqarput.

- Suliaq siammasissumik misissuiffigineqarpoq paasissutissanik pingaaruteqartunik katersilluta. Taamaalillutalu pinerluttuisinnaasoq pisarisimallugu. 

- Misissuinerup takutippaa innuttaasut annilaangassutissaqanngittut. 

Tasiilami sumiiffik Naasuliartarpimmumiittoq assersorneqarpoq, Danmarkimiillu misissueqqissaartartut attavigineqarlutik.

- Pisoqarfiusoq assiaqusersornikuuvarput, ulluni tulliuttuni aamma taamaatsiinnarneqarallassooq. Innuttaasullu qinnuigissavagut assiaqusersuineq ataqqissagaat aamma qanillinaveersaassagaat. 

Innuttaasut suliamut attuumassuteqarsinnaasunik pingaarutilinnillu paasissutissaateqarunik politiit oqarasuaataannut 70 14 48-mut erngertumik saaffiginninnissaat Kalaallit Nunaanni Politiit kaammattuutigaat.