Dronning Margrethe coronavirusimik tunillatsissimasoq

Dronning Margrethe coronavirusimik tunillatsissimavoq.

Kunngikkormiut tusagassiutinut ullumi pingasunngornermi taama nalunaaruteqarput.

Dronningi coronavirusimik tunillatsissimasutut ippassaq marlunngornermi unnukkut paasineqarpoq.

Dronningi napparsimanermut sakkukitsuinnarmik ersiuteqartoq nalunaarutigineqarpoq, maannalu Amalienborgimi Christian IX's Palæmi mattusimalluni.

Dronningip Norgemut sulinngiffeqarluni ukiuunerani angalanissaa ullumi aallartittussaagaluarpoq, tamannali maanna taamaatiinnarneqarluni. Kunngikkormiut taama allaaserisaqarput, peqqinnissaqarfiullu innersuussutai malinneqartut erseqqissaatigalugu.

Dronningi coronavirusimut pingasoriarluni akiuussuserneqarsimavoq. Siorna 2021-mi januaarip aallaqqaataani siullermik kapitippoq, pingajussaanillu kapitissimanera novembarip naalernerani nalunaarutigineqarluni.

AAMMA ATUARUK Dronningip Nuummut tikeraarnerani ulloq kingulleq: Eqqaassutissaq biskoppinngortitsinerlu

Kunngikkormiuni coronavirusimik aatsaat tunillatsittoqanngilaq. Kunngissammi nulia Mary erneralu Prins Christian coronavirusimik siusinnerusukkut aamma tunillatsissimapput.

Coronavirusip tuniluunnera pissutaalluni pisussatut aaqqissuussat amerlasuut ukiut kingulliit marluk ingerlaneranni taamaatiinnarneqartariaqarsimapput.

Dronningip ukiortaami pisarneq malillugu nalliuttorsiortitsisarnera ukiut marluk tulleriissillugit taamaatiinnarneqarput.

Dronningillu dronningitut ukioq manna januaarimi ukiunik 50-inngortortorsiorneranut atatillugu malunnartitsiniaarnerit pilersaarutigisamit annikinnerupput. Pisussatut aaqqissuussat arlallit ukiaru aatsaat pisussatut kingorna pilersaarutigineqalerput.

Peqqinnissaqarfiup innersuussutai malinneqartut kunngikkormiut erseqqissaatigaat.