Dronning Margrethe qitimigut ullut arfineq-pingasut matuma siornatigut suliaritereerluni Rigshospitalimit angerlarpoq.

Kunngikkormiut tusagassiorfinnut nalunaarummi taama ilisimatitsipput.

Dronningi Amalienborgimiippoq. Dronningi sivisuumik sungiusarneqassaaq, qaammatinilu tulliuttuni marlunni sungiusarneqassagunartoq nalilerneqarpoq.

Kunngissaq Frederik tamanna pillugu naalagaaffimmi qullersaagallassaaq, dronningillu suliassai isumagigallartussaallugit.

- Dronningip Rigshospitalimiinnermini pikkorilluinnartunit suliarineqarlunilu isumagineqarnini qujamasuutigaa, kunngikkormiut tusagassiutinut nalunaarumminni ilaatigut allapput.

Dronningi qitimigut februaarip ulluisa 22-anni suliaritippoq, qitimigullu aappassaa suliaritilluni.

Dronningi qanorpiaq suliaritissimanersoq, kunngikkormiut sukumiisumik nalunaarutiginngilaat.