Dronning Margrethe ullumi inuuissiorpoq
Dronning Margrethe, kunngissakkut meeraallu sisamat peqatigalugit Aarhusip eqqaani najugaqarfimmi Marselisborg Slotip aneersuaartarfianut ullumi siusinnerusukkut anillappoq.
Dronningimi 82-iliilluni ullumi inuuissiorpoq. Coronavirus pissutaalluni inuuissiornerit ukiut kingulliit marluk ingerlaneranni pisortatigoortumik nalliussineqartarsimanngillat.
Dronningi poorskikkunni ukioq manna Marselisborg Slotimiippoq, sakkutuunillu illussaarsuup saavani takusassiisoqarluni.
Inuit tuusintilikkaat dronningi nalliussiniarlugu illussaarsuup saavani najuupput. TV2 Østjylland taama nalunaaruteqarpoq.
Dronningip ukiut marluk matuma siornatigut 80-iliinera persuarsiutigalugu nalliuttorsiutigineqartussaagaluarpoq, balletimik isiginnaartitsissusiortoqarlunilu qummoroortartortoqartussaagaluarluni.
Coronalli ajornartoortitsinera tassa pissutaalluni tamakku kinguartinneqartariaqarsimallutik.
Siorna taama aamma pisoqarpoq, dronningillu qanigisani taamaallaat peqatigalugit Fredensborg Slotimi siorna nalliussineqarluni.
Dronningip dronningitut ukioq manna januaarip ulluisa 14-ianni ukiunik 50-inngortorsiorpoq, pisortatigoortumillu tamanna nalliussineqarnissaa aamma kinguartinneqarluni.
