Ilisimasassarsiorneq: Norgemi kunngissaq ilisimasassarsioqataasoq
Norgemi kunngikkormiut nittartagaanni tamanna atuarneqarsinnaavoq.
Norges Arktiske Universitetip, UiT-p, ukiunik 50-inngortorsiornera malunnartinniarlugu Tromsømilu katersugaasiviup, Tromsø Museumip, ammarneqarneraniit ukiut 150-inngornerat malunnartinniarlugu taama angalasoqarpoq.
Kunngissaq Haakon angalaqataalu Ilulissaniit qimusserlutik tingerlaataasersorlutik ippassaq sisamanngornermi aallarput.
Angalasut ingerlaarnerminni apummit misissugassanik tigusisassapput, tigusallu taakku immikkut ilisimasallit EastGRIP-imik taaguuserlugu Sermersuarmi misissuiffiannut, avannamut 800 kilometeritut ilorpasitsigisumiittumut, tunniunneqassallutik. Immikkut ilisimasallit Sermersuup avannamut kangimut ingerlaarfianit qillerillutik tigusillutik tassani ilaatigut misissuipput.
- Sermersuarmukassaagut, 800 kilometerinillu ingerlaareerluta EastGRIP-imut apuutissalluta. Immikkut ilisimasallit naapinnissaat qilanaaraara, suliaallu pillugit paasisaqarnerulissallunga, silap pissusia sermersuullu aakkiartornera pillugu maani Kalaallit Nunaanni paasisat pillugit paasisaqassallunga. Taamaalereerpat Tunumut taava ingerlaassaagut, kunngissaq Haakon oqarpoq.
Angalaqatigiit Daneborgimut juunip aallartisimalaarnerani anngunnissaat pilersaarutaavoq. Kunngissarli Haakon aqqutip ilaannaani peqataassaaq.
Angalaqatigiit ingerlaarnerat UiT-p nittartagaani malinnaavigisinnaavat.
Angalaqatigiit suli aallanngitsut kunngissaq Haakon Ilulissani Kangiata Illorsuanut pulaarpoq, borgmesteri Palle Jeremiassen kommunaldirektørilu Nick Nielsen tassani ataatsimeeqatigalugit.
