Emanuel Nuko nakuusersimasutut unnerluutigineqartoq

Naleqqamit politikerip Inatsisartuni unnerluutigineqarsinnaannginnera septembarimi atorunnaarsinneqarpoq. Taanna maanna februaarimi eqqartuussivimmiittussanngorpoq.

Allattoq Hanna Vestergaard Hviid

januaarip 04-at 2023 15:34

Naleqqamit Inatsisartuni Kommuneqarfik Sermersuumilu kommunalbestyrelsimi ilaasortaq, Emanuel Nûko Tasiilami februaarip qulingiluaani eqqartuussaassaaq.

Eqqartuussinissamik nalunaarut tamanut ammasoq naapertorlugu taanna nakuusersimasutut politiillu peqqussutaannik unioqqutitsisimasutut unnerluutigineqarpoq.

Emanuel Nûkop eqqartuussaanissani siorna septembarimi nammineerluni paasissutissiissutigaa, tamatumalu kingorna Inatsisartut matoqqasumik ataatsimiinnerminni taassuma unnerluutigineqarsinnaannginneranik atorunnaarsitsinissartik aalajangerpaat.

AAMMA ATUARUK Emanuel Nûko Naleqqameersoq eqqartuussivimmi sassassasoq

Emanuel Nûko unnerluutigineqarnermi kingunitsianngua Inatsisartunit Kommuneqarfik Sermersuumiillu sulinngiffeqannginnissamik qinnuteqarpoq.

KNR-ip Naleqqamit politikeri oqaaseqartinniarsarigaluarpaa, taannali iluatsinngilaq.

Nutaarsiassami kukkunermik nassaarsimaguit uunga allaffigineqarsinnaavugut.