Emanuel Nûko: Eqqortoq ajugaajuaannassaaq

Unnerluussisut Emanuel Nûkomut nakuusersimanermut suliaq Nunatta Eqqartuussisuuneqarfianut ingerlateqqippaat, inuttaatali ernumaginngilaa.

Allattoq Rune Hvistendal Kristiansen

februaarip 27-at 2023 15:35

Nutserisoq Paornánguak Kleist

- Ernumassuteqanngilanga. Eqqortoq ajugaajuaannassaaq, Emanuel Nûko KNR-imut taama oqarpoq.

Taama oqarpoq, unnerluussisut Nunatta Eqqartuussisuuneqarfianut suliamik ingerlatitseqqissimanerat saqqummiunneqarsimalermat.

Nakuusersimasutut politiillu peqqussutaannik malinnissimanngitsutut unnerluutigineqarluni eqqartuussaagami Tasiilami Eqqartuussisoqarfik Sermersuumit 12. februaari pinngitsuutinneqaraluarpoq.

SULIAQ EMANUEL NÛKOMUT TUNNGASOQ PILLUGU

Emmanuel Nûko Tasiilami nakuuserniartutut pissusilersorsimanera tamanullu ammasumi toqqissiviilliortitsisimasutut maajip ulluisa 16-ianni 2021-mi unnukkut nalunaaqutaq qulinngoriitsiartoq tigusarineqarpoq. Tamanna unnerluussummi KNR-ip pissariarisaani allassimavoq.

Inatsisartunut ilaasortaq 15-it 20-llu akornanni imigaqarsimasoq unnerluussummi allassimavoq.

Emanuel Nûko tamatuma kingorna inummut allamut nipituuliorluni assortuussuteqartoq, kingornalu arlaleriarluni niaquatigut annersillugulu uppisillugu ajassimagaa, allassimavoq.

Politiit aggersarneqarmata, politiinit eqqissisarneqaraluarpoq, iluatsinngitsumilli.

Taanna nikorfaffimminit nikissanngitsoq marloriarluni politiinit oqarfigineqaraluarpoq. Taannali pinaaserluni politiinut tallini atorlugit annersitsisimasoq unnerluussummi allassimavoq.

Politiit tamanna pissutigalugu qasilitsortalimmik seqqaallutillu tigusarinnipput.

Naleqamit politikeri aamma Inatsisartunut ilaasortaq unnerluussutinut marlunnut Eqqartuussisoqarfik Sermersuumit februaarip aqqaneq-aappaani pinngitsuutinneqarpoq.

Unnerluussisussaatitaasut taassuma ulluni 30-ni pineqaatissinneqarsimasunut inissiisarfimmiittussanngortinneqarnissaa piumasarigaluarpaat.

Unnerluussut naapertorlugu Emanuel Nûko unnerluutigineqarpoq politiit malittarisassaannik unioqqutitsisimasutut Kommuneqarfik Sermersuup malittarisassaanik paragraf 18-ip immikkoortuani 3-mik kiisalu pinerluttulerinermik inatsimmik 88-mik unioqqutitsisimasutut.

Allisiguk

Emanuel Nûkomut suliaq ingerlateqqinneqassanersoq eqqarsaatigissallugu unnerluussisut taamani ulluni 14-ini piffissalerneqarput. Sapaatit akunneri marluk maanna qaangiummata Nunatta Eqqartuussisuuneqarfianut ingerlateqqissallugu aalajangersimapput.

Aamma atuarukEmanuel Nûko nunatta eqqartuussisuuneqarfianut suliassanngortinneqartoq

- Eqqartuussisut ingerlateqqissallugu aalajangerpugut eqqartuussiviup aalajangiinera isumaqatigeqqissaannginnatsigut. Taamaammat Nunatta Eqqartuussisuuneqarfiata suliamik suliaqartinnissaat kissaatigaarput, Kalaallit Nunaanni Politiini immikkut unnerluussisoq Lars Petersen oqarpoq.

Eqqartuussisoqarfik Sermersuumi unnerluussisut piumasaraat Emanuel Nûko ulluni 30-ni pineqaatissinneqarsimasunut inissiisimarfimmiitinneqarnissaat piumasaraat.

Ernumanngilaq

Emanuel Nûkop nunatta eqqartuussisuuneqarfiani inernerusup allaanerunissaa naatsorsuutiginngilaa.

- Soorunami siullermik oqaatigisinnaavara Sermersuup eqqartuussiviani suliaq naammassivoq. Nunatta Eqqartuussisuuneqarfiani ingerlateqqinneqarpat ajunngitsumik inerneqaqqittussatut aamma ilimagaara.

Inummut nakuuserniarsimanani politiinullu nakuuserniarsamani oqarpoq.

- Unnerluussissummi allassimasut ilumuunngillat. Unnerluussissummi allassimasut arlallit iliumuunngillat, taamaammallu pinngitsuutinneqarlunga.

Emanuel Nûko KNR-imut oqarpoq maajimi Inatsisartunut utissalluni.

Suliaq qaqugu Nunatta Eqqartuussisuuneqarfiani suliarineqassanersoq unnerluussisunit ilisimaneqanngitsoq Lars Petersen oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.