Erdoganip Europa qimaasorpassuaqalernissaanik mianersoqqugaa
Syriap avannamut kippasissortaani eqqissiviilliornerit unitsinneqanngippata qimaasut 2015-imili aatsaat taama amerlatigisinnaanissaat Erdoganip Europamiunut mianersoqqussutigaa.
Qimaasut 80.000-init amerlanerusut Syriap ilaanit Idlibimit Tyrkialialeruttortut Erdoganip oqalugiarnermini mianersoqqussutigaa.
AAMMA ATUARUK Syriap sakkutuuisa Kurderit Tyrkiap saassussiffigisaaniittut ornikkaat
Syriamit qimaasut 3,7 millionit missaat Tyrkiamiipput, nunarsuarmi nunanut allanut qimaasut akornanni amerlanerpaallutik.
Tyrkiamut qimaasut pillugit nunanit allanit ikiuisoqanngippat qimaasut Europamut ingerlateqqinneqarsinnaanissaat Erdoganip arlaleriarluni sioorasaarutigereerpaa.
AAMMA ATUARUK 70.000-t Syriap killeqarfiani illoqarfinnit qimaasut
Syriami nunap immikkoortuani Idlibimi inuttaasut 3 millionit missaanniipput, Syriamilu pikitsitsisut annerusumik Idlib aqutaralugu.
Syriami naalagaaffiup sakkutuui Ruslandimit ikiorneqartut, Idlibimi qaartartumeerinertik annertusivaat, tamannalu pissutaalluni inuit tuusintilikkaat Syriamit Tyrkiamut qimaallutik.
/ritzau/Reuters
