Erik Jensen ukiumut amilaarfimmut: Assortuuttarnerit ingutsisarnerillu unammillernarnerpaapput
Partii, 1979-imi pilersinneqarmalli Kalaallit Nunaanni politikkimi aquttuunerpaasimasumut, ukioq manna pisoqarfioqaaq.
Siumup Inatsisartuni amerlanerussuteqarfini annaavaa, borgmesteriutitaqarfiit marluk ikinnerussuteqarfigilerpai qinikkallu eqqartuussaasimasut eqqartuussaasunngortulluunnit.
Ukioq pisoqarfioqaaq. Siornalu siulittaasunngortumut tamanna unammillernarsimavoq.
- Erik Jensen Siumumi novembarip 29-ani 2020-mi siulittaasunngorpoq.
- Sisimiuni julip 15-ani 1975-imi inuuvoq.
- Heidi Ramsøe nuliaraa pingasunik paneqarlutik
- Meeqqanut inersismasunullu isikkamik assammillu arsarnermut ukiut 23-t sinnerlugit sungiusaasoq.
- Ini A/S-ip Sisimiuni qullersaqarfiani aningaasaqarnermut siunnersorti.
- Folketingimit 2015-imi Siumut sinnerlugu qineqqusaarngaarpoq.
- Kommunalbestyrelsimut Qeqqata Kommunianut 2017-imi qinigaavoq.
- Naalakkersuisuni 2017-imi ilaasortanngorpoq.
- Inatsisartunut 2018-imi ilaasortanngorpoq.
Kilde: Inatsisartut
- Ukiup affaa siulliup missaa nukipparujorujussuarnik atuiffiusimavoq. Novembarimi siorna siuttunngornitta kingorna pisoqarfiusimaqaaq.
Erik Jensen ukioq 2021 pillugu taama aallartippoq.
Partiimi avissaartuuttut
Erik Jensenip Kim Kielsen partiimi siulittaasutut siorna novembarip 29-ani taarserpaa. Taanna partiimi avissaartuuffiusumi 39-nit qinerneqarluni siuttunngorpoq Kim Kielsens 32-nik qinersiseqartoq.
Siulittaasunngornerminit ukiup affaa siulleq partiimi ataatsimoortinniarneranut nukini atorsimavai.
- Ilutsinni assortuuttarsimanerit, inunnik ataasiakkaanik mingutserisarsimanerit tamakkua initoorujussuusimapput. Taakkua qimallugit ataatsimoornermik taarserlugit, suleqatigiinnermik taarserlugit ingerlanneqarsinnaanissaanik suliniarnera aallussimavara. Siulersuisuunerit, inatsisartuni qinikkat kommunimilu qinikkat suleqatigeqqissaarlugit.
Oqitsuinnaasimanngitsoq Erik Jensen oqarpoq.
- Partiimi taama angitigisumi siuttunngussagaanni allassimasoqanngilaq qanoq ingerlatseriaaseqartoqassanersoq. Taamaattumik unammillernartorujussuusimavoq qanoq sammivilimmik qanorlu aqutseriaatsimik ingerlatsiniarneq, oqarpoq, nangipporlu:
- Isummat assigiinngitsorpassuit katersornissaat, piviusunngortinnissaat, naaperiaasinnaanerit ingerlannissaat tamakkua soorunami unammillernartorujussuusimapput.
Partiimi ataatsimoornerulernertik siulittaasutut angusamini pingaarnerit ilaattut taavaa.
- Pissaaneqarniunneq qimallugu ataatsimuulernerput malunnaateqarnerpaarpaatut isumaqarfingaara.
- Siumut tarrarsorfigineqarsinnaalluni tatigineqarneralu annertusarlugu ingerlatileruttorparput. Politikkitta suuneranik oqaluttuat assigiinngitsut ingerlatileruttorlutigit. Tunngavitsinnut uteqqinnerput, suleqatigeeqqilernerput taakkua pingaarnertut oqaatigisariaqarput.
Qinikkat unnerluutigineqartut eqqartuusaasimasullu
Inatsisartunut qinersineq piffissaanngitsumi suaarutigineqarmat Siumut tunuliaqutaralugu qinigassanngortittut nutaat amerlapput.
Qinigaanerpaat ilagaat Aslak Jensen Qarsoq Høegh-Damilu. Taakku Kim Kielsenimit Erik Jensenimillu taamaallaat qinigaanerpaatut qaangerneqarput.
Inatsisartunut qinersisoqareernerata kingorna, Qarsoq Høegh-Dam ikiaroornartumik tuniniagassamik 49 grammimik angerlarsimaffiani nassaartoqarsimaneranut unnerluunneqarami eqqartuunneqarnermini pisuutinneqarsimasoq, saqqummiunneqarpoq. Taassuma Inatsisartunut qinigaagaluarnerminit pisoq tunuassutigaa.
Inuit unneqqarillutik aallaqqaataaniilli paasissutissiisimatinnagit pisumut assigusut qineqqusaartoqalertinnagu pinaveersaartinneqarsinnaaneri ajornartut Erik Jensen oqarpoq.
- Inummiippoq ataasiakkaani qineqqusaartussami unneqqarissutsimut piumasaqaat, paasissutissiinerit aamma ingerlanneqartarlutik, Erik Jensen oqarpoq.
- Taamaattumik sioqqutsilluta pinngitsoortissimasinnaanissaanik ilaannikkut ajornakusoortorujussuusarpoq. Paasissutissat piginnginneri peqqutigalugit.
Aslak Jensenimut suliaq qanimut malinnaaffigigitsik ilanngullugu oqaatigaa. Aslak Jensen pisortani sulisumut sioorasaarisimasutut unnerluutigineqarpoq, januaarillu 17-iani eqqartuunneqassalluni.
Kommunimut qinersineq partiimut kinguariarnerujussuusoq
Inatsisartunut qinersineq Siumumi qinikkani pinerluuteqarsimasoqarnera kisimi saqqummiunneqanngilaq. Avannaata Kommuniani qinerneqarnerpaaq Minik Høegh-Dam, Qarsoq Høegh-Damip qatanngutaa, hashilerisutut pasineqarluni aamma eqqartuunneqarpoq.
AAMMA ATUARUK Borgmesterinngulersoq hashilerisutut pasineqarluni Nunatta Eqqartuussiviani suliassaasoq
Pisoq Minik Høegh-Damip partiimit anisitaaneranit kinguneqarpoq.
- Nuannersuuneq ajorpoq taamatut aalajangertariaqarneq.
- Kisianni tassa suulluunniit aalajangikkat assigiinngitsunik peqquteqartarput. Tusatsiagaannaat aallaavigalugit aalajanginnginnissaq pingaaruteqartarpoq. Taamaattumik malitassat malillugit assigiinngitsullu paasissutissat aallaavigalugit suliat ingerlanneqarsimapput.
Minik Høegh-Damip Palle Jerimiassen Avannaata Kommuniani borgmesteritut taarsertussaagaluarpaa. Taassumi Partii Naleraq isumaqatigiissusiorfigigaluarpaa.
AAMMA ATUARUK Palle Jerimiassen Siumumut ilaasortaajunnaartoq
Siumup Avannaata Kommuniani amerlanerussuteqarnini kisiat annaanngilaa. Kommune Kujallermi borgmesteriuteqarnini aamma annaavaa.
"Illuatungiulittunngorneq pitsaasutut nalilerneqarsinnaavoq"
Siumup nunatsinnut aquutip annaanera partiimi torersaanissamut periarfissiisoq siulittaasoq oqarpoq.
- Inuiaqatigiit qinersinerat ataqqisassaavoq. Oqariartormata "Siumut massakkut illuatungiliuttutut inissisimalaarluni, imminut sammilluni torersaanissaminut periarfissipparput". Taama inissisimalerneq suliarivarput, Erik Jensen oqarpoq.
Naalakkersuisunut siulittaasunngornissaminut anguniagaqarnini tunniutigiinnarfiginngilaa.
- Taamaattumik qularutigineqassanngilaq tulliani qinersinermi suli nukittoriaqqinneruinnarluta annerusumillu sunniuteqarsinnaanissatsinnut anguniangaqarnissatsinnut massakkut sulinerput ingerlatileruttoripput.
Partiip ukiaq Qooqquni ataatsimiinnermini silaannaq salissimagaa siulittaasoq oqarpoq. Partiip politikkiminik periusissiaminillu ingerlatseqqinnissamut siulersuisuunerit qinigaatitallu peqatigalugit ataatsimeeqatigigamigit.
- Illuatungiliuttunngorneq pitsaasutut aamma nalilerneqarsinnaavoq. Immitsunnut taamaalilluta aaqqitassatsinnik samminnissinnaanitsinnut periarfissinneqarpugut.
- Soorunami pissaanerup aquutip tigummiunnaarnera uggornartuugarluartoq.
