Iranimut pillaatitut nutaat EU-mi akuersissutiginiaraat

Iranimut pillaatitut iliuutsit nutaat, EU-mi nunat ataasinngornermi akuersissutiginiarpaat.

EU-p nunanut allanut tunngasuni qullersaa Josep Borrell, EU-mi nunat nunanut allanut tunngasunut ministeriisa Bruxellesimi ataatsimiinnissaat sioqqullugu taama oqarpoq.

Josep Borrellip, Iranip nunanut allanut tunngasunut ministeria tallimanngormat oqaloqatigaa, pillaatitullu iliuuseriniakkat tassani ilisimatitsissutigalugit.

AAMMA ATUARUK FN- ataatsimiittartoqatigiivisa Iranip pissaanermik atornerluinera misissuleraat

Borrell ima issuarneqarpoq:

- Iranip nunanut allanut tunngasunut ministeria sivisuumik oqaloqatigaara. Toqumut pillagaasimasunik toqutsinerit eqqartorpavut, EU-llu tassunga atatillugu assuarinninnera saqqummiuppara, pillaatitullu iliuutsit ullumi akuersissutigineqartussat ilisimatitsissutigalugu, Borrell oqarpoq.

Akerliussutsiminnik takutitsisunik toqumut eqqartuunneqarsimasunik Iranimi toqoraanerit, Iranillu sakkussianik Ruslandimut pilersuinera pissutaallutik EU Iranimut pillaatitut iliuutsinik nutaanik akuersissuteqarniartoq Borrellip tunngavilersutigaa.