EU puisit amii pillugit paasititsiniaanerusariaqarsorineqartoq
Nunat EU-mut ilaasortaasut ilanngaaserisui taamaallaat maannamut paasititsiniaavigineqarsimapput.
Tamanna naammanngilluinnartoq Folketingimi Kalaallit Nunaat pillugu ataatsimiititaliami siulittaasup tullia Aaja Chemnitz Larsen, Inuit Ataqatigiinneersoq oqarpoq.
- Kalaallit Nunaannut takornariartartorpassuit ilisimasanngilaat puisit amiinik pisisinnaallutik EU-mullu angerlaallugit. Taamaattumik isumaqarpunga tamanna iluamik paasititsiniutigineqartariaqartoq, taamaalilluni Kalaallit Nunaanniit avammut tunisineq iluaquserneqassammat, Aaja Chemnitz Larsen oqarpoq.
Piumasarineqartoq tassaavoq Europami atuisartunut EU paasititsiniaasariaqartoq.
Bruxellesiarneq pissaaq Europa-Parlamentip Issittup siunissaa pillugu isumaliutissiissut akuerimmagu ullut pingasut qaangiutiinnartut. Taannattaaq oqallisigineqartunut ilaassaaq.
