Europami nunat kiarujussuarnerata kingunerisaanik pinngortitami ikuallattoqarnera unammillissutigigaat
Europap kitaani ulluni makkunani kiangaatsiarpoq, pinngortitamilu ikuallannernik tamanna ajorseriaannartitsilluni. Frankrigip Atlantikumut sineriaata nalaani innuttaasut najukkaminnit maanna qimagussorneqalerput.
Illoqarfissuup Bordeauxip eqqaani orpippassuit 1200 hektaritut annertutigisut ikuallassimapput. Qatserisartut 600-nit ikinnerunngitsut qamisaanermut peqataapput. Bordeaux-mit kujammut innuttaasut hunnorujulikkaat najukkaminnit qimagussorneqarsimapput.
Pilatimi Europami sioqqat ipinnguussimasut portunersaanni Bordeauxip kujataa-kippasissuanit 60 kilometerinut ungasitsigisumi tammaarsimaartut 6000-it missaanniittut sumiiffimmi 37 gradinik kiattumi ikuallattoqarnera pissutiglaugu pingasunngornerup unnuaani qimagussortinneqarput.
Spaniami Portugalimi sumiiffinni amerlasuuni 40 gradit sinnerlugit sapaatiummat kiappoq. Tamaani qatserisartut orpippassuarni pinngortitamilu sapaatit-akunnerit kingulliit ingerlaneranni ikuallannerit akiorniarsarisimavaat.
Silap pissusiata allanngoriartornerata kingunerisaanik kiattorujussuusaqattaartoq immikkut ilisimasallit oqaatigaat. Nunani tamalaani ataatsimut isigalugu kiannerusalernerata kingunerisaanik pissutsit ajorsiartuinnavissasut immikkut ilisimasallit oqaatigaat, allaammi kiannerungaatsiartalernissaa ernummatigineqarluni.
