FE: Danmarki sakkutooqarnikkut massakkorpiaq sioorasaarneqanngilaq

Ruslandip massakkorpiaq assersuutigalugu Danmark imaluunniit nuna Natomut ilaasortaasoq eqqarsaatiginngilaa.

Forsvarets Efterretningstjeneste (FE) (Illersornissaqarfiup Kilitsissiaqarfia) taama naliliivoq.

Folketingemi Illersornissamut ataatsimiititaliamiit apeqqummut illersornissamut ministeri Morten Bødskov (S) akissuteqarpoq.

- Ruslandip sakkutooqarnikkut Nato-mik akerleriiffeqarnissaa ilimanaateqanngilaq. Ruslandip Danmarkimut sakkutooqarnikkut pissaanermik atuerusussinnaanissaa ilimanaateqanngilaq. FE taamaalilluni naliliivoq Danmark toqqaannartumik sakkutooqarnikkut sioorasaarneqanngitsoq, FE akissummini taama nalunaarpoq.   

Kisianni akissummi nalunaarutigineqarpoq pissutsit piffissap sivikitsunnguup iluani allanngoriaannaasut. Assersuutigalu imaasssappat "pissutsit massakkut pissangartorsiorfiusut Ruslandip Natollu akornanni sakkutooqarnikkut akerleriiffinngornissaannut ineriartortoq".

Ruslandip 24. februaari nuna sanilini Ukraine sakkutuuleramiulli sioorasaarivoq nunanut Ukrainemik sorsunnermi tapersersuisunut kinguneqartitsiniarluni.  

Danmarkip aamma tamanna piareersimaffigaa. Ilaatigut ullaat tamaasa Skrydstrupimiit timmisartut sorsuutit F-16-it marluk Bornholmimi Rønnep tungaanut aallartarput. Timmisartut ullup annersaani tassaniittarpiut unnukkut angerlamut utertinnatik.

Russit nakkutigissallugit suliassaraat, taakkumi timmisartuminnik Bornholm qaninngoorsinnaalluarmassuk.

Ukioq manna siusinnerusukkut danskit naalakkersuisui nalunaarput USA-mik illersornissaq pillugu isumaqatiginninniarniarlutik amerikamiut sakkutuui Danmarkiliarsinnaanissaannik kinguneqarsinnaasumik.