Fieldsimi aallaasersortoqarnerani ikilingaatsiarsimasut tamarmik perulukkunnaartut
Inuit sisamat Fieldsimi sapaatiummat aallaasersortoqarnerani ikiligaatsiarneqartut maanna tamarmik inuunerminnik navianartorsiorunnaarput.
Region Hovedstaden TV 2-mut marlunngornermi ualikkut taama paasissutissiivoq. Matumanili maanna qanoq innerat pineqartoq ilanngullugu erseqqissaatigineqarpoq. Tassa imaappoq, eqqugaasut qanoq innerat ajornerulersinnaavoq.
Ikilerneqartunit pingasut perulukkunnaartut ataaserli peruluttoq – tassa inuunerminik navianartorsiortutut taaneqartartumiittoq ataasinngornermi nalunaarutigineqarpoq. Aallaasersortoqarneranilu pinerluffigineqartunit inuunerminik navianartorsiortoqarunnaartoq marlunngornermi nalunaarutigineqarpoq.
AAMMA ATUARUK Qimassanngilaanga: Jensine Fieldsimiit uinilu qimaanermini taama eqqarsarpoq
Københavnimi politiit ikilingaatsiarsimasut tassaasut arnat marluk danskisut innussaassuseqartut 19-inik 50-inillu ukioqartut aamma angut 50-inik ukiulik svenskisut innuttaassuseqartoq kiisalu niviarsiaraq 16-inik ukiulik svenskisut innuttaassuseqartoq.
Inuit pingasut toqusut
Angut pisiniarfissuarmi sapaatiummat ualikkut kingusissukkut seqqoqattaalermat inuit pingasut toqutaapput.
Aallaasersortoqarfiusumit inuit qimarranneranni pisiniarfinnilu perusuersartarfinni toqqorniarsarineranni assilisat videoliallu paatsiveeruttoqangaatsiartoq takutippaat.
Politiit aallaasersortoqarnera pillugu nalunaaqutaq 17.30-p missaani nalunaarfigineqareerlutik pisiarfissuarmut Amagerip kippasissortaaniittumukaapput.
AAMMA ATUARUK Sara Brandt Fieldsimi perusuersartarfimmi minutsit 15-ingajaat toqqoqqasoq
Angut 22-nik ukiulik Field’sip silataani biilit unittarfiata eqqaani nalunaaqutaq 17.48 tigusarineqarpoq. Taanna aqaguani Københavnip eqqartuussisuni inatsit tunngaviusoq naapertorlugu killisiorneqarpoq.
Angutip tarnimikkut napparsimasut pinerluuteqarsimasut immikkoortortaqarfianut matoqqasumi ulluni 24-ni tigummigallarneqarnissaa eqqartuussisup aalajangerpaa.
