Fieldsimi filmertarfiup ammaqqinnissani utaqqisikkallaraa
Fieldsimi pisiniarfiit amerlanerit angutip 22-nik ukiullip maanna paarineqarluni opaarunneqarsimasup aallaasersornerani inuit pingasut toqutaanerata kingorna pisiniarfissuup tamarmi sapaatip akunnerani ataatsimi matoqqaneranerani matoqqareerlutik ataasinngornermi ammaqqipput.
Pisiniarfissuarmili filmertarfik Nordisk Film ammaqqittunut ilaanngilaq, tassanimi sulisoq ataaseq toqutaasut ilagaat.
Fieldsimi aallaasersortoqarnera ataatsimut isigalugu:
Københavnimi politiit pisiniarfissuarmi Fieldsimi aallaasersortoqartoq sapaammi nalunaaqutaq 17.36 (danskit nalunaaqutaat) nalunaarfigineqarput.
Politiit oqarnerat naapertorlugu Fieldsimi sumiiffinni assigiinngitsuni marlunni seqqortoqarpoq.
Inuit pingasut toqutaapput. Nukappiaraq niviarsiararlu 17-inik ukiullik kiisalu angut russitut innuttaassuseqartoq 47-nik ukiulik Danmarkimili najugaqartoq.
Tamatuma saniatigut inuit sisamat aamma eqqorneqarput. Taakkunannga ataaseq peruluppoq.
Inuit allat 23-t aallaasersortoqarnerani aamma ajoqusersimapput.
Politiit angut 22-nik ukiulik danskisut innuttaassuseqartoq aallaasersortoqarnerata kingorna tigusaraat.
Angut ataasinngornermi inatsit tunngaviusoq naapertorlugu killisiorneqarpoq, ullunilu 24-ni tarnimikkut napparsimasut immikkoortortaqarfianni matoqqasumi tigummineqartussanngortinneqarluni.
Sulisut filmertarfiup ammaqqinnginnerani piffissamik suli pisariaqartitsipput. Nordisk Filmip filmertarfiinut pisortaq, Casper Bonavent oqarpoq.
- Filmertarfimmi suleqatigut annilaarnartumik nalaataqarluti suleqatiminnik annaasaqarput. Taamaammat ammaqqinnginnitsinni piffissamik suli pisariaqartitsivugut, pisortaq allakkatigut oqarpoq.
Taassuma Nordisk Filmip filmertarfiisa ammaqqinnissaq pilersaarusioraa ilanngullugu oqaatigaa, taamaakkaluartorlu suli ullulerneqannginnerarlugu.
25-t Elgigantenimi sulisut
Elgiganten Fieldsimi pisiniarfippassuit toqoraasoqarneranit sapaatip akunnera ataatsip kingorna ammaqqittut ilagaat.
Pisiarfimmi tassani sulisut ammaaqqinnermi qanoq innerat immikkut ukkatarineqarpoq. Attaveqaqatigiinnermut pisortaq, Ditte Opstrup Andersen oqarpoq.
- Tamatta aalassassimavugut. Tamanna qularnanngilaq, kisianni ulluinnarnut uteqqissaagut. Immitsinnut oqaloqatigiinnikkut suliulluarnitsinnut uteqqissaagut.
AAMMA ATUARUK Anja Taunajiip Fieldsimi toqoraasutut pasisaq qanimorpaa: Eqqarsarpunga killissara tikillugu
Attaveqaqatigiinnermut pisortap saassussisoqarnerata naalaani 25-t missaanniittut sulisimasut oqaatigaa. Elgigantenip Fieldsimi pisiniarfiani sulisut katillugit 100-juupput.
Taakku tarnip pissusiannik oqaloqateqarnissamik neqeroorfigineqarlutillu sulinngikkallarnissamik neqeroorfigineqartut, attaveqaqatigiinneetmut pisortaq oqarpoq.
Taassuma qanoq amerlatigisut tamatumani pisariaqartitsinersut oqaatigisinnaanngilaa.
Pisorli Elgigantenimi suliffissanut atatillugu unammillernartoqartitsinngitsoq, Ditte Opstrup Andersenip ilanngullugu oqaatigaa.
Sulisunut ikiuigasuartoqartoq
Jyskimi suliffissanut atatillug aamma unammillernartoqanngilaq. Tamanna Jyskip tusagassiuutinut pisortaa, Martin Fyn Aamand oqarpoq.
Fieldsip oqaaseqartartuata, Stine Rysgaardip pisiniarfissuarmi pisiniarfinni 135-ni sulisut sulileqqinnissaminnut toqqissisimanissaat pingaartuusut ataasinngornermi oqaatigaa.
Fieldsip sulisut ammaqqinnginnermi pisiniarfissuarmut alakkaaqqaarsinnaatillugillu ajornartoornermi ikiuigasuarnermik ilaatigut neqerooruteqarfigai.
AAMMA ATUARUK Qimassanngilaanga: Jensine Fieldsimiit uinilu qimaanermini taama eqqarsarpoq
Angutip pasineqartup inuit pingasut Fieldsimi juulip ulluisa pingajuanni sapaammi toquppai. Taakkulu saniatigut inuit arfineq-marluk seqqornermini aamma eqqorlugit.
Pinerlussimasutut pasineqartoq ullormi tassani tarnikkut napparsimasut immikkoortortaqarfiannut inissinneqawrpoq, toqutsisutullu toqutseriarsimasutullu pasineqarluni.
Field’s sapaatip akunnerata siulia tamaat tamanut matoqqavoq.
