Fieldsimi toqutaasut eqqaaniarlugit minutsi ataaseq nipaallisimaneqassaaq

Aqagu ataasinngornermi ullaakkut Københavnimi pisiniarfeqarfissuaq Field´s kingumut ammartussaaq, sapaatiummat kingullermik aallaaneqarlutik toqutaasut eqqaaniarlugit minutsimi ataatsimi nipaallisimaneqassaaq.

Eqqaaniaaneq nalunaaqutaq ullup qeqqanut aallartissasoq, Field´s tusagassiutinut nalunaarpoq.

- Københavnimi politiit qatserisartoqarfiillu isumaqatigiissuteqarfigilluareerlugit, naliliisinnaanngorsimavugut Field´d ammaqqinnissaminut isumannaalleqqittoq, nalunaarummi taama allapput.

- Immikkut paasisimasalinnik aamma siunnersorneqarpugut, annilaartarneq sivitsortumillu qisuariaateqaqattaarneq qaangilertorneqassappat ammasarfiit nalinginnaasut ammaqqinneqarpata pitsaanerussasoq, taakku allapput.

Pisiniarfeqarfissuarmi sapaatiummat inuit pingasut toqutaareernerisa kinguneranik pisiniarfeqarfissuaq sapaatip akunnera ataaseq matoqqatinneqarpoq, aallaaneqartunilu sisamat pinartorsiortut oqaatigineqarpoq.

Københavnimi politiit centerersuarmi misissueqqissaarnertik sapaatip akunnerata naanerani naammassivaat.

Maannalu pisiniarfeqarfissuaq ammaqqeriaannanngortoq erseqqissaatigineqarpoq.

Field´s aqagu ataasinngornermi ullaap tungaani qulinut ammassaaq.

Politiit najuutissapput

Pisiniarfeqarfissuaq ammarpat politiit najuutissapput, taakku inuit isaasut ernummateqarlutik apeqqutissaqassagaluarpata akinissaminnut piareersimatinneqassapput, politiillu ullaap tungaani quliniit unnukkut arfineq-pingasut tungaannut najuutissapput.

Pisariaqarpallu ajornartorsiornermi saaffiginnittoqarsinnaassaaq, politiit Twitterikkut taama nalunaarput.

Pisiniarfeqarfissuarmullu orniguttut piumagunik aamma naasunik ilisinissaminnut tikilluaqqusaapput, soorluttaaq allani taama pisoqartartoq.

Ikumaartunillu ilisisoqarniarpat innermik ikumassanngillat elektriskimilli ikissinnaasuussapput ikuallattoqaratarsinnaanera pinerullugu.

Field´simi eqqaassinermut sapaatip akunnerata siuliani pisumut atatillugu angut 22-nik ukiulik tigusarineqarpoq, taannalu inunnut pingasunut toqutsisimasutut aammalu inunnut arfineq-marlunnik toqutseriarsimasutut unnerluutigineqarpoq.

Taanna ataasinngormalli tarnimikkut napparsimasut parnaarussivimmi immikkoortortaqarfianni ulluni 24-ni tassaniittussanngorlugu paarineqarluni parnaarusimaneqarpoq,