Filip Magnussen Marika Magnussenilu sisoraaserluni ooqattaasarnermi nunatsinni pissartanngortut
Nunatsinni Biathlonertartut peqatigiiffiata sisoraaserluni ooqattaasarnermi pisortatigoortunngitsumik pissartanngorniutsitsineq 2017-ip kingornanit aatsaat aaqqissuuteqqippaa. Tamanna Nuummi pivoq.
Naak peqataasut amerlavallaanngikkaluartut meeqqat inuusuttullu akornanni unammisoqarluni ooqattaasartoqarpoq.
Meeqqat inuusuttuaqqallu unammineranni, nukappiaqqani Filip Magnussen niviarsiaqqanilu Marika Magnussen ajugaapput.
- Sukkasoorujussuupput teknikkigissorujussuullutillu. Tassami sisorarneq piginnaasaqarfigereeramikku. Ooqattaasarluni unamminernut aamma angusarissaarnissaat ilimanaateqartorujussuupput, ujakkaartartuni NSP-imi inuusuttunut sungiusaasoq, Nivi Geisler oqarpoq.
Inersimasuni angutini Martin Møller, arnanilu Ukaleq Slettemark ajugaapput.
Nunatsinni sisoraaserluni ooqattaasartartut pisortatigoortuunngitsumik Nuummi pissartanngorniummata, peqataasuni 13-iusuni inersimasut sisamat meeqqallu inuusuttuarartallit qulingiluat peqataapput.
Sisoraaserluni ooqattaasartarfeqalernissaaa suli ungasittoq
Peqatigiiffik Greenland Biathlon unamminermi aaqqissuisuuvoq. Coronap kingorna aaqqissuusseqqissinnaanertik nuannaarutigalugu, aaqqisuisooqataasoq Uiloq Slettemark KNR-imut allappoq. Ooqattaasarfissamilli sungiusarfiusinnaasumik pilersitsinissaq suli ungasittoq aamma oqaatigivaa.
Ukiulli tamaasa sisoraaserluni oqaattaasarnermik Nunatsinni pissartanngorniuttoqartalerumaartoq, peqatigiiffiup neriuutigaa.
Sisoraaserluni ooqattaasarneq norskit sakkutuuinit 1950-ip qiteqqunnerata missaani ineriartortinneqarluni unammissutaaqqaarpoq.
AAMMA ATUARUK Kalaallit Nunaanni sisoraaserluni ooqattaasarfissaq siulleq piareersarneqarpoq
Nunanit tamalaanit peqataasoqartarluni unammissutitut maanna atugaavoq.
1960-imili OL-ertoqarnerani unammissutitut atoqqaartinneqarpoq, taamani angutinit taamaallaat unammissutigineqarluni. Arnat aatsaat 1992-imi OL-ertoqarnerani sisoraaserluni ooqattaasarnermi unammisalerput.
Sisoraaserluni ooqattaasarnermi OL-eqataaqqammersup Ukaleq Slettemarkip meeqqat unammeqataasut ooqattaasarnermik sungiusarpiarsimanngikkaluarlutik ooqattaasallaqqinnerat tupigusuutigigaa, aaqqissuisut Greenland Biathlonimeersut tusagassiutinut nalunaarumminni oqaatigivaat.
- Pikkorinaartorujussuuakka. Ooqattaasarluartut amerlapput, naak sungiusarpiarsimanngikkaluarlutik, Ukaleq Slettemark oqarpoq.
