Finlandimi inatsisartut Ruslandimut killeqarfitsik ungalulersornissaanik isumaqatigiittut
Finlandip Ruslandimut killeqarfini ungalulersorlugu aallartinniarpaa.
Partiit Finlandimi inatsisartuni ilaasortaatitaqartut isumannaallisaaneq pillugu marlunngornermi ataatsimiipput.
Oqaluuserisassani killeqarfiup ungalulersorneqarnissaanut apeqqut inituvoq.
Finlandip killeqarfiinik nakkutiginnittut, killeqarfiup isumannaatsuunisssaanik akisussaasuusut, killeqarfimmi ungalulersuinissaq pisariaqartoq oqaatigaat.
- Killeqarfimmik nakkutiginnittut isumaannik ministeriunertut apeqqusiinngilanga, Finlandimi ministeriuneq socialdemokratiusoq Sanna Marin oqarpoq.
AAMMA ATUARUK Russit Ukrainemi sorsukkiartortinneqarnissartik pinngitsoortinniarsarigaat
Ungalulersuinissamut misiligutitut atorneqartussamik ukiormannamut missingersuusiortoqarpoq, Finlandip kujataata kangisinnerusortaani killeqarfiup eqqaani kilometerinik arlalinnik takitigisunik ungalunik misiligutinik sanasoqassaq.
Misiligutitut suliaq naammassineqarpat partiillu suliap ingerlaannarnissaa isumaqatigiissutigippassuk, ungalulersuinerup ukiut sisamat qaangiuppata naammassineqarnissaa pilersaarutaavoq.
Rusland Ukrainemi februaarip ulluisa 24-anni saassussilluni aallartimmalli, Finland Sverigelu illersoqatigiinnut NATO-mut ilaasortanngornissaminnut qinnuteqarput.
