Finlandimi ministeriuneq misissisorneqareerluni ikiaroornartutorsimanngitsoq paasineqartoq
Finlandimi ministeriunerup Sanna Marinip katerisimaarluni nuannaffiusumi videoliarineqarnerata saqqumiunneqarnerata kingorna oqallisaasorujusssuanngorpoq.
Ministeriunerulluni taama festertoqarsinnaanngitsoq isornartorsiusut isumaqarput, ministeriuneq ikiaroornartutorsimasutut isornartorsiuisut aamma pasivaat.
Sanna Marin ikiaroornartutorsimanersoq misissisorneqarmat ikiaroornartutorsimanngitsoq paasineqarpoq.
Finlandimi statsministereqarfik taama nalunaaruteqarpoq.
Misissortissimalluni unnerluussutinut ilumuunngitsunut illersorniarluni, Finlandimi statsministerip nalunaaruteqarami ima oqarpoq:
- Inuutillunga aamma inuusuttuaraallunga ikiaroornartutornikuunngisaannarpunga. Neriukkaluarpunga oqaatsikka tatigineqarlutik inuiaqatigiinni inuussasugut. Misissortinnisara toqqarpara uannut pasillertoqarmat.
AAMMA ATUARUK Sanna Marinip nunarsuarmi naalakkersuisut siulittaasuini nukarlerpaalernissaa akuerineqartoq
Katerisimaarluni nuannattoqarnerani Sanna Marinip sulinngiffeqarnerani pisoq tallimanngornermi paasineqarpoq.
Taamaattumik tusagassiortunik katersortitsisoqarnerani aperineqarpoq, fiistertilluni atorfini isumagisinnaassaneraa pisariaqartinneqaleruni.
Naalakkersuisut allaffeqarfiinukartariaqarneq unnuakkut misiginikuusimanagu oqarasuaatikkullu attavigineqasinnaajuaannarluni, tassunga apeqqummut socialdemokraatit ministeriunerat akissuteqarami oqarpoq.
Suliffik suliffiullu avataani pisut immikkoortinneqarnissaat pingaartikkini, Sanna Marinip aalajangiusimallugu oqaatigaa.Ministeriunerugaluarlunilunniit fiistersinnaatitaasariaqarnerarpoq privatimillu inuuneqarluni.
