FN-miit nalunaarusiaq: Taliban eqqartuusinertaqanngitsumik toqumik pillaasaqattaartoq

Talibanip sorsuttartui ingasaassiniat eqqartuusseqqaaratik toqoraasimanerannik nalunaarummik, Naalagaaffiit Peqatigiit inuit pisinnaatitaaffiinnik suliaqartut pisortaat, Michelle Bachelet, tigusaqarpoq.

AAMMA ATUARUK Afghanistanimi arnat takussaajunnaartut

- Afghanistanimi Talibanit eqqunngitsuliorsimanerannik, eqqartuusseqqaaratik toqoraanerannik, arnallu pisinnaatitaaffiinnik killilersuinerannik tutsuiginartumiit nalunaarummik tigusaqarpugut, Michelle Bachelet, oqarpoq.

Talibanit nakkutigineqarnissaat qulakkeerneqassasoq Michelle Bacheletip kaammattuutigaa.

Talibanit Afghanistanimi naalakkersuisuusimasunut tapersersuisunik ujaasillutik illuniit illunut iseqqattaartut aamma nalunaarutigineqarpoq.

AAMMA ATUARUK Afghanistanimi eqqissineqarnissaa pillugu Nuummi malunnartitsiniaasoqartoq

Afghanistanimi sumiiffiit ilaanni arnat aneqqusaanginnerannik niviarsiaqqallu atuariartoqqusaanginnerannik Naalagaaffiit Peqatigiit nalunaarummik pissarsisimasoq, Michelle Bachelet oqarpoq.

- Tusagassiortunut, inuiaqatigiinnilu kinguaariinni nutaani aqutsilersimasunut arnanulluunniit kinguneqarnerlussinnaanera ernummatigineqartorujussuuvoq, Michelle Bachelet oqarpoq.