Naalagaaffit Peqatigiit issittumi 38 gradinik kiannera ernummatigaat

Issittumi ataatsimut isigalugu siorna aatsaat taama kiatsigaaq.

Naalagaaffiit Peqatigiinni silasiortut suleqeqatigiiffiata WMO-p tamanna marlunngornermi uppernarsarpaa.

Ruslandimi illoqarfik Verkhojansk, qaasuitsup killeqarfianit avannamut 100 kilometeritut avannarapasitsigisumiippoq, siornalu 2020-mi juunip ulluisa 20-anni 38 gradinik kialluni.

Tamaani 1885-imi uuttortaasoqartalermalli aatsaat taama kiatsigaaq.

Aarlerinartoqarneranernik tamanna takussutissaasariaqartoq WMO-p qullersaata Petteri Taalasip oqaatigaa:

- Issittumi aatsaat taama kiatsigineranik uuttortaasoqarnera, WMO-p silapilunneranik silallu pissusianut tunngasunik toqqorsivianut nalunaarsuinerni takornartaajunnaariartorpoq, silallu pissusiata allanngoriartornera eqqarsaatigalugu tamanna aarlerigineqartariaqarpoq, taanna oqarpoq.

Issittumi ulluni arlalinni siorna kiassuarnerani aatsaat taama kiatsiginera uuttortarneqarpoq, ukiullu kiannerpaaffiusimasut pingajoralugu.

Sikuiuitsoq Kujallermi aatsaat taama kiatsigaluni 18,3 gradinik kiattoq siorna aamma uuttortarneqarpoq.