Folketingip Kalaallit Nunaat pillugu ataatsimiititaliaaneersut nunatsinnut tikeraartut
Folketingip Kalaallit Nunaat pillugu ataatsimiititaliaani ilaasortat nunatsinnut paasisassarsiorluni sapaatit-akunnerata massuma ingerlanerani angalassaaq.
Ataatsimiititaliami ilaasortat Tasiilaliarlutillu Kuummiunut Nuummullu ataasinngornermiit arfininngorneq ilanngullugu angalassapput.
Tasiilami katersortarfimmi aqagu ualikkut tallimanit arfinernut innuttaasunut ataatsimiititsisoqassaaq. Nuummi kulturikkut illorsuarmi Katuami pingasunngornermi piffissami tassani innuttaasunut aamma ataatsimiititsisoqassaaq.
Meeqqanik Ilaqutariinnullu sullissivik, meeqqat angerlarsimaffiat politiillu politikerinit ilaatigut pulaarneqassapput, inunnik isumaginninnermi suliap killiffia tassani paasisassarsiorfigineqassalluni.
Tasiilami inuuniarnermi ajornartorsiutit ukiuni kingullerni sammineqangaatsiarsimapput, assersuutigalugu imminut toqunnerit, kinguaassiutitigut atornerluinerit. Meeqqanik inuusuttunillu sumiginnaanerit pinaveersaartinniarlugit suliniutinut Folketingi 80 millionit koruuninik 2019-imi aningaasaliivoq.
- Tasiilami ukiuni kingullerni allannguutit suliniutillu pitsaasut takunissaat ataatsimiititaliap siunertaraa. Inuussutissarsiornermi peqatigiiffik, isumaginninnermik inuiaqatigiinnilu iluaqutaasussanik siuarsaanissaq pillugit ingerlataqartoq Siu Tsiu ilaatigut ataatsimeeqatigissavagut illoqarfimmilu Meeqqat illussaat pulaassallugu, ataatsimiititaliami siulittaasoq, Aaja Chemnitz (IA) oqarpoq.
AAMMA ATUARUK Danmarkimut kissaatit tunniuppagut - qanoq aningaasartaqartiginissaa suli oqallisigisassaavoq
Folketingip Kalaallit Nunaat pillugu ataatsimiititaliaani ilaasortat aamma Nuummukassapput, pinerluuteqarsimasunut inissiisarfik nutaaq tassani ilaatigut pulaarneqassalluni.
Soorlu aamma eqqartuussisoqarfimmi sulisut sinniisaat, eqqartuussissuserisullu peqatigiiffianni ilaasortat ataatsimeeqatigineqassasut. Ataatsimiititaliaq arfininngornerup tungaanut nunatsinniissaaq.
Folketingip Kalaallit Nunaat pillugu ataatsimiititaliaani ilaasortat katillugit 29-upput, taakkunannga arfineq-marluk maannga angalaqataassallutik.
Kalaallit Nunaata Folketingimut ilaasortaatitai nunatsinni angalaqataasunut ilaassapput.
- Tamatta tusarnaarniarluta maaniippugut, aamma Kalaallit Nunaannut tunngasunik oqaaseqartartut misilittagaqarluartut soorlu Karsten Høngep, Chrstian Juhlip aamma Rasmus Jarlovip peqataanerat nuannaarutigaara. Folketingimi ilaasortat amerlasuut Kalaallit Nunaannik ilisimasaqarnerunissaat nunattalu soqutigisaanik suliaqarnissaat pingaaruteqarpoq, Aaja Chemnitz oqarpoq.
