Nunatsinni sukkorneq pillugu sullissivileqalernissaanut 382 millionit koruuninik aningaasaliisoqartoq
382 millionit koruunit. Novo Nordisk Fondenip nunatsinni sukkorneq inooriaaserlu pillugit ilisimatusarfiusussamut taama aningaasaliiniarpoq.
Steno Diabetes Center Grønland ukiut sisamat qaangiuppata Nuummi sanaartorneqareerluni atoqqaarfissiornissaa naatsorsuutigineqarpoq, tassani peqqissutsimik suliallit soorlu peqqissaasut, nakorsallu sulilissallutik.
Taakkua sukkornermik inooriaatsimillu nappaatinik katsorsaallutik, paasititsiniaallutik, ilisimatusarlutik taavalu ilisimasanik katersissapput.
Aningaasaliissutit 382 millionit koruunit marlunnut avinneqarput. Ilai sullissivimmik sanaartornermut ilaalu sullissivissap 2024-mi ammarpat ingerlatsinermut atorneqarneqassapput.
AAMMA ATUARUK Novo Fond sukkorneq pillugu sullissiviliornissamut millionerpassuarnik aningaasaliiniartoq
Suli suliarinnittussarsiortoqanngimmat sanaartornissaq qanoq aningaasartuutaatigissanersoq, Novo Nordisk Fondenip paasissutiginngilaa.
382 millionit koruunit ukiunut qulinut, tassa 2030-p tungaanut aningaasaliissutaapput, suliniullu aasaru juulip qaammataanit aallaartissaaq.
Novo Nordisk Fonden Namminersorlutik Oqartussallu tusagassiutinut nalunaarummi taama allapput.
Sukkortut amerliartortut
Sukkortut, anigugassaanngitsumik pualluuteqartut aallu taqqap naqitsineranik qaffasitsitsisut nunatsinni 6.500-t missaanniipput.
Napparsimasullu ukiuni tulliuttuni amerlerujussuarsimassasut Novo Nordisk Fondenip Namminersorlutillu Oqartussallu ilimagaat.
2030-mi napparsimasut 9.300-uussagatinneqarput, eqqugaasullu amerlanersaat arlalinnik nappaateqalersimanissaat ilimagigitsik aningaasaliisut allapput.
Sinerissamit isigaluni attaveqatigiissutitigut nakorsiartoqartalissasoq
Nuna tamakkerlugu sullissivissap Nuup avataani najugallit aamma sullitarissavai. Taakku attaveqaatit atorlugit imminnut isigaluni oqaloqatigiinnikkut nerisaqarneq aalasarnissarlu pillugit ilaatigut siunnersorneqartassapput.
- Innuttaasut nakorsiarnissaminnut nappaatillu suussusaanik paasitinneqarnissaminnik attaveqatigiissutitigut nakorsiarnissamut periarfissaat inerisarneqassaaq. Nakorsiartussat Nuummukartariaqartut taamaalillutik ikinnerulersinnaanissaat nakorsamilluunniit immikkut ilisimasalimmit illoqarfimminnut nunaqarfimminnulluunniit tikinneqarnissartik utaqqisarunnaarnissaat neriunarluni, aningaasaateqarfik tusagassiutinut nalunaarummi allapput.
AAMMA ATUARUK Aningaasaateqarfik sukkorneq pillugu Nuummi sullissiviliorusuttoq
Sullissivik nunatsinni peqqinnissaqarfiup ilarilissavaa
Novo Nordisk Fondenip siulersuisuisa siulittaasuata Lars Rebien Sørensenip sullissivissaq qilanaaraa.
- Suliniut Kalaallit Nunaanni sukkortut inooriaatsimillu nappaatit pillugit ilisimatusarnermut, katsorsaanermut, pinaveersaartitsinermut ilinniarnermullu suliniutit nutaat immikkuullarissumik periarfissiivoq. Kalaallit Nunaanni tamakkuninnga napparsimasukinnerulernissaa, nappaateqareersullu sivisunerusumik pitsaanerusumillu inuunissaat anguniagaraarput, siulittaasoq oqarpoq.
Novo Nordisk Fondenip sukkorneq pillugu Danmarkimi sullissiviit tallimat pilersitseqataaffiginikuuai.
