Gerda Tellesen Narsarsualiarnermini akunnerit aqqaneq marluk timmisartoreerluni Københavnimut uterpoq
Air Greenlandip timmisartoq attartugaa Jet Time 139-nik ilaasulik marlunngornermi Københavnimiit Narsarsualiarluni aallarpoq.
Ilaasut Kangerlussuarmut ingerlaannarput, taakkunanngalu 128-t Kangerlussuarmiit Københavnimut uterteqqinneqarput.
61-inik ukiulik, Gerda Tellesen Qaqortumeersoq ilaasut ilagaat, taassuma meeqqat pingasut, ataaseq 13-inik ukiulik, ataaseq aqqaneq marlunnik nukarlerlu pingasunik ukiulik kisimiilluni angalaqatigai. 13-inik ukiulik ernutaraa.
- Narsarsuarmut miliivillutalu tassanngaannaq qummut aallaqqikkatta. Uima Narsarsuarmi mittarfimmiit timmisartorsuaq mikkiartortoq isigisimagaluarpaa, timmisartorli minngitsoorpoq, Gerda Tellesen oqarpoq.
- Timmisartumi ilisimatinneqarpugut Kangerlussuarmut unnuiartussasugut.
Qasupput, maalapput kiagullutillu
Narsarsuarmi putsut atsippallaarnerat peqqutaalluni timmisartumi aquttup mittarfik takusinnaanngimmagu, timmisartoq Narsarsuarmut missinnaanngilaq.
- Kangerlussuarmut ingerlaarpugut, mikkatta nukarleq pingasunik ukiulik assut qasulerami, maalalluni kiagullunilu. Kangerlussuarmut mikkatta oqarfigileriallarpaatigut niussanngitsugut. Silamut anillassanngitsugut, taamalu timmisartoq silaannaluk, inoqarnermik.
Kangerlussuarmut aallaannartariaqaleramik Kangerlussuarmi unnuissasut ilisimatinneqaraluarput. Taamaattoqanngilarli. Kangerlussuarmi akunnittarfiit ulikkaaqqammata ilaasut 128-t Kangerlussuarmi unnuisinnaajunnaarput. Gerda Tellesen meeqqallu pingasut taakku ilagaat.
AAMMA ATUARUK Kangerlussuarmi inissaqartitsinnginneq – Air Greenlandip ilaasui Københavnimut utertinneqartut
Taakku akunneq sinnerlugu Kangerlussuarmiipput, timmisartumiilli nioqqusaannginnamik Gerda peqqiillioqaaq.
- Uanga niaqorlullungalu merianngugama migrænerlunga, assut uanga nuanniilliorpunga. Tassa silaannarissartitaanngiivilluta akunnernik aqqaneq marlunnik timmisartumiititaavugut.
Ilaasut Kangerlussuarmiinnerminni utaqqisarfimmut aamma niusinnaatitaanngillat. Timmisartumi allami ilaasut aamma Kangerlussuarmut tikittut isumannaallisaasunit isumagineqarmata, Jet Timemik Narsarsualiaraluartut niugallarnissaannut isumannaallisaavimmi inissaqartitsisoqanngilaq.
- Meeqqanik pingasunik angalaqateqarluni ataaserlu pingasuinnarnik ukiulik taamatut angalatitaalluni sakkortoqaaq. Isersimatitaaginnarneq taama silaannalutsigisumik, meeqqat uniffeerullutik aallaamasut, inersimasullu nippakkaluttuinnarlutik pileramik. Imeruersaatinilluunniit neqeruunngillat, aatsaat qangattaqqikkatta imermik tunineqarpugut.
Ulluni pingasuni errortanik atisassaqanngitsut
Gerda Tellesen meeqqallu pingasut maanna Københavnimiipput.
Taakku tallimanngornermi Narsarsuarmut aallassasut Air Greenlandimiit ilisimatinneqarput. Københavnimili unniuffissaqartinneqaramik tamanna ajorinngilaat.
Danmarkimulli uteramik ilungersuummernartumik nalaataqaqqinnerarluni taanna KNR-imut oqarpoq.
- Danmarkimut tikikkatta aamma kufferterput tammarami, allanillu atisassaqarata. Aatsaallu ullut pingasut qaangiuppata kuffertigut sumiinnersut pillugit tusagaqarumaartugut Air Greenland ilisimatitsilluni. Meeqqat atisai assannik errorlugit aqagumut ateqqittariaqassavaat.
