Hardenberg nersornaatisivoq: Isumaqarlunga asuli allagarsillunga

Kalaaleq eqqumiitsuliortoq Julie Edel Hardenberg mailikkut allagarsigami isumaqaqqaaraluarpoq oorinnanniartut arlaannit allagarsilluni, kingusinnerusukkulli paasinarsivoq allagarsiaa killormorluinnaq isumaqartoq.

Julie Edel Hardenbergip eqqumiitsuliaasa piukkunnaateqarluartuuneri Henry Heerup Hæderslegatimit nersorniarneqarput taamaattumillu Julie Edel Hardenberg legatinnatinneqarpoq.

. - Soorunami suliama nersorniarneqarnerat attortinnarpoq nuanneqalunilu, kajumissusermillu tuniseqaaq, Julie Edel Hardenberg KNR-mut oqarpoq.

Maili pasinapiluttoq ajunngilluinnartumik imaqarpoq

Novembari naalersoq Julie Edel Hardenberg mailikkut allagarsivoq Henry Heerup Hæderslegatimiit nersorniarneqarluni.

Taannali isumaqaqqaaraluarpoq mailikkut mittatilliiniat ilaata iluanaapiluffiginiaraani.

- Internetsikkut misissorluaqqippara, tassami ilaanni peqquserlunniartoqartarmat, oqarpoq.

Aalajangerporli utaqqeqqilaarniarluni imaassinnaavormi allagarseqqittoq.

Massakkorpiaq aamma Julie Edel Hardenbergip eqqumiitsuliai Wienimi Østrigimiittumi saqqummersinneqarput.

Oqqassaarisarnini nersorneqaatigaa

Ullualuilli matuma siorna allagarseqqippoq, tamatumuuna aperineqarpoq mailisiani siulleq tigusimaneraa.

Tamatumuuna  Julie Edel Hardenberg qularunnaarpoq.

Siulersuisut tunngavilersuutigaat, Julie Hardenberg eqqumiitsuliortarnermigut inuiaqatigiinnut oqallissaarinermik pilersitsisartoq.

- Suliakka aqqutigalugit nunasiaataasimaneq inuiaqatigiinnilu aaqqissuussaaneq pillugu apeqqusersuisarpunga, Julie Edel Hardenberg oqarpoq.

Legati pineqartoq qinnuteqaatigineqarsinnaanngilaq innersuunneqarnikkulli aatsaat pissarsiarineqarsinnaalluni.