Hashimik eqqusseriaraluartut pingasut tigusarineqartut
Kalaallit Nunaanni politiit KNR-mut taama paasissutissiipput.
Taakkunannga marluk ikiaroornartumik hashimik iioraasimapput pingajuallu ikiaroornartoq hash nassataminut ilillugu eqqusseriaraluarluni.
Tigusarineqartut pingasut ikioqatigiillutik ikiaroornartumik hashimik anngiortumik eqqusseriaraluarnersut kalaallit nunaanni politiinit maanna oqaluttuarineqarsinnaanngilaq, politiit pinerluttoqarsimaneranik paasiniaanerat suli ingerlanneqarmat.
AAMMA ATUARUK Arsaarinnittoqaqqippoq: Ikiaroornartumik iioraallutik eqqusseriartut arfinillit unitsinneqartut
Septemberip qaammataani inuit arfinillit ikiaroornartumik hashimik iioraasimallutik anngiortumik eqqusseriaraluartut tigusarineqarput.
Piffissami tassani inuit katillutik 39-it ikiaroornartumik hashimik eqqusseriaraluartut paasineqarput.
Tigusarineqartartut amerleriarnerannut politiit pissutaanerarpaat, anngiortumik eqqusseriaraluartunik paasiniaasarnerminnik pikkorinnerulersimagamik.
Ikiaroornartut anngiortumik eqqunneqartarnerisa akiorniarneqarnissaat Kalaallit Nunaanni Politiit piffissami sivitsortumi aallutarisimavaat.
Politiit Kangerlussuarmi takussaanerulersimapput, amerlanerusummi timimut scannerutikkoortinneqartalerput, politiillu aqqusinermi saqqumilaarnerulersimallutik, politiit pakasaallutik misissuinerusalersimallutik, Lars Bjerregaard Kalaallit Nunaanni politiineersoq KNR-imut siusinnerusukkut taama oqarpoq.
