Hvideruslandip illersornissaqarfia sakkutuuminik annertuumik sungiusartitsilersimasoq

Hvideruslandip illersornissaqarfia sakkutuuminik annertuumik sungiusartitsilersimavoq. Sakkutuut sakkuuaassinnaanissamut sungiusartinneqassasut, Hvideruslandimi oqartussat nalunaarutigaat.

Hvideruslandip, Ruslandip Ukrainemik saassussineranut toqqaannartumik tapersersorsimanngilaa, russilli sakkutuuisa Ukrainemut isaaneranni Hvideruslandimit isaatissinnaatitaasimallugit.

Sakkutuut Hvideruslandimi annertuumik sungiusartinneqalersimasut, Hvideruslandimi oqartussat pingasunngornermi nalunaarutigaat.

Sungiusarnerup nunanut qanigisamiittunut Europamulluunniit siooranartoqanngitsoq, Hvideruslandimi oqartussat illoqarfiit pingaarnersaannit Minskimit oqaatigaat.

Hvideruslandimi sakkutuut sungiusartinneqarnerat qanimut malinnaavigineqartoq, Ukrainemi oqartussat nalunaarutigaat.

AAMMA ATUARUK Ukraine og Rusland gør klar til at forhandle

Hvideruslandip sakkutuuisa russit Ukrainemi saassussinerannut ilannguteratarsinnaasut, Ukrainep killeqarfianik nakkutilliisut oqaatigaat:

- Piareeqqavugut, Andrij Demtsjenko, killeqarfimmi nakkutilliisut oqaaseqartitaat, tuluit nutaarsiassaqartitsiviannut Sky Newsimut oqarpoq.

Hvideruslandip Ruslandip Ukrainemik saassussineranut ikiuinera pissutaalluni nunat killiit Hvideruslandimut pillaatitut iliuuseqalersimapput.

Hvideruslandip aqutsisua Aleksandr Lukasjenko, Ruslandip præsidentianik Vladimir Putinimik qanimut suleqatigisaqartuuvoq.

Hvideruslandimi 2020-mi qinersisoqarmat Hvideruslandimi akerliussutsimik takutitsinerpassuaqarpoq, Lukasjenkomi iligisaasalu qinersinermi peqquserluttuliorsimasutut pasineqaramik.

Lukasjenko, Europami kisermaassilluni aqutsisut akornanni kingullertut taaneqakkajuppoq.