ICC-p Nunavummik isumaqatigiissut nuannaarutigigaa
Naalakkersuisut Nunavummilu naalakkersuisut ”Paaseqatigiinnissamik isumaqatigiissut (Memorandum of Understanding)” sapaatit-akunnerata siuliani atsiorpaat.
Inuiaat Issittumi najugallit, ingammik naggueqatigiit Inuit naalakkersuinikkut siuttui isumaqatigiissusioraangata tamanna Inuit Issittormiut Siunnersuisoqatigiiffiata ICC-p siunertarisaanut naapertuuppoq. ICC-p siulittaasua Sara Olsvig taama oqarpoq,
- Inuiaat Issittumi najugallit, ingammillu naggueqatigiit Inuit naalakkersuinikkut isumaqatigiissusioraangata, ajunngitsorujussuarmik isigivarput, ICC-p siulittaasua Sara Olsvig oqarpoq.
Kultureqarnerup, ilinniartitaanerup, aalisarnerup, mingutsitsinngitsumik nukissiuuteqarnerup iluani nunallu taakkua marluk akornanni angalanerunissaq pillugit suleqatigiinnerup annertunerulersinneqarnissaa isumaqatigiissutigineqarpoq.
Nammineq oqartussaaffeqarnermik tigusineq
Kalaallit Nunaat Nunavullu 2000-imi isumaqatigiissusioreersut Sara Olsvigip tikkuarpaa. Taamanikkunniilli pisoqangaatsiarsimavoq, Kalaallit Nunaammi namminersulerpoq, isumaqatigiissutilllu nutarterneqarnissaa pissusissamisoortoq ICC-p siulittaasua isumaqarpoq.
AAMMA ATUARUK Sara Olsvig ICC-mi tamarmi siulittaasunngortoq
Naallu Kalaallit Nunaat Danmarkip ataani, Nunavullu Canadap ataanni inissisimagaluartut, namminneq aalajangiisinnaassuseqarnerannik takutitsinerusoq taanna oqarpoq:
- Nammineq oqartussaassuseqarnermik tigusinermik una isigineqarsinnaasutut isigivara. Taannalu nunat inoqqaavisa, soorunami nunarsuarmi tamarmi, kisianni aamma Issittumi pisinnaatitaaffiinik siuariartornissamillu suliniuteqartuarnermi qitiujuaannarpoq. Tassalu nammineq aalajangiisinnaatitaaneq, Sara Olsvig oqarpoq.
Immikkoortut pingasut tikkuarai
ICC-p siunertaasa ilaat pingasut isumaqatigiissummiittut taassuma tikkuarpaa.
AAMMA ATUARUK Kuupik V. Kleist: Inuit bør eje Tartupaluk, ikke staterne
Nunat marluk taakku akornanni ajornannginnerusumik angalasoqarsinnaalernissaa Kalaallit Nunaanni Nunavummilu naalakkersuisut aamma kissaatigaat.
Nunani taakkunani talittarfiit mittarfiillu atorneqarsinnaanissaat siunniunneqarpoq.
Nunatsinni Nunavummilu nunat atortulersugaanikkut piorsaavigineqarnisssaat ICC-p kissaatigaa.
Naalakkersuisut, Nunavummilu naalakkersuisut aalisarnerup pitsanngorsarneqarnissaa sulissutiginiarpaat, kultureqarnerullu iluani suleqatigiittoqarnerulernissaa anguniagaavoq.
- Tamannalu aamma takusinnaavarput, Kulturikkut suleqatigiinnerulernissaq iliartitaanikkullu suleqatigiinnerulernissaq, tassuuna naapertuilluinnartuusoq.
