Ilaasussat kanngittut ingerlaqqissinnaalersut
Silap ippassaq anorsarinnera Air Greenlandimut kipiluttunartorsiortitsileraluartoq ullumi atoruminarneruvoq.
Nuummi Maniitsumilu anorlingaatsiarnera pissutigalugu sisamanngormat ilaasussat 228-t Kangerlussuarmut kanngipput, tamannalu sumiiffinni marlunni sakkortuumik anorlerneranik peqquteqarpoq.
Timmisartoqarfimmi hotelini inissat tamarmik ulikkaarneri pissutigalugit, ilaasussat kanngittut arlallit timersortarfimmut inissinneqartariaqarsimapput,
Ullumili ilaasussat kanngissimasut amerlanerpaartai apuuffissaminnut timmissunneqartut, Air Greenlandimi paasissutissiinermut pisortaq Katja Vahl KNR-mut oqarpoq.
- Ikkussortagarujussuartut ittoq ilungersuutereerlutigu kiisami aaqqiivugut. angalanissamut pilersaarut nutaaq nassiupparput. Qaanaamiit Qaanaamullu angalasussat kisimik timmisartup Dash 8-p teknikkikkut akornuteqarnera pissutigalugu kinguarput, aqaguli aaqqinnissaa sulissutigaarput, Katja Vahl oqarpoq.
Nunatta kujasissortaa aamma silap anorlerneranit sisamanngormat tallimanngormallu eqqorneqarpoq. Ilaasussallu nutaamik angalanissamut pilersaarusiuunneqarput, Air Greenlandimi paasissutissiisartoq ilisimatitsivoq, nangipporlu:
Atlantiku ikaarlugu timmisartuussisartumik allamik attartortariaqartut
Pissutsit ilungersunartut qaangiussorinaraluartut, suli ajornartoorfiit atuupput.
- Timmisartuutitta ilaani maskinarliorpugut, tamannalu pilersaarutinik aamma equsoortitsivoq. Teknikerigulli sapinngisartik tamaat atorlugu tamatuminnga aaqqiiniarsaripput, neriuppugullu aqagu sapaammi tamanna aaqqereersimassasoq, Katja Vahl oqarpoq nangipporlu:
- Qeqertarsuulli tunuani aamma unammillernartoqarniarunarpoq, ullummi tulliini taavani putserlunilu nuisserniarpoq, tamannalu ullaakkut timmisartuussinissanut kalluaanngitsoorunnanngilaq. Taamaattoqassappallu allatut ajornartumik timmisartuussinissat kinguartariaqassapput, taamaattoqassagaluarpallu ilaasussat pineqartut piaarnerpaamik nalunaarfigineqarumaarput.
Timmisartuussinissamut kinguaattoornerit aamma nassataraa, Kastrupip timmisartoqarfiani ingerlariaqqinneq ajulertoqarmat.
Air Greenland ilanngullugu ilisimatitsivoq, timmisartorsuarnik atlantiku ikaarlugu timmissussisartunik marlunnik attartorsimallutik, timmisartorsuillu taakku ilaasussanik Kastrupip timmisartoqarfissuani kanngeqqasunik timmissusissapput.
- Taama pisoqarnera ilaasussatsinnut ajuusaarutigaarput, Katja Vahl oqarpoq.
Juulip qiteqqunnerani nuna tamakkerlugu ilaasussanik kanngittunik ajornartoorneq pivoq, ilaasussammi 1000-t kanngimmata allatut ajornartumik bilitsinik tuniniaaneq unitsinneqaraluarpoq, kanngittut amerligaluttuinnaqqunagit. Billetsinilli tuniniaaneq juulip 18-iani ammaqqinneqarpoq.
