Ilisimatusartut piniartullu Ittoqqortoormiit eqqaani sikorsuarnut mattussaallutik nikinnaveertut
Ittoqqortoormiit eqqaanni ilisimatusartut sisamat ulluni pingasuni sikorsuup qaavani nikeriarnaveeraluartut ullumi sapaammi qulimiguulimmit aaneqarput.
Taamatuttaaq piniartut pingasut taakkununnga angalaqataasut nerisassaannik pajunneqarput. Piniartulli pingasooqqaaraluartut maanna sisamanngorput umiatsiat marluusut tamarmik marlunnik inuttaqarpata isumannaannerussammat.
Piniartut sisamaat qulimiguulimmik ilisimatusarunik aallersumut ilaalluni pisoqarfiusumukaanneqarsimavoq
Kalaallit Nunaanni politiit pigaartuata Bent Johnsenip KNR-mut ilisimatitsissutigaa.
Politiit erseqqissaapput, pineqartut tamarmik ajunngitsut, qulimiguulillu atorneqartoq ilisimasassarsiortut suliffeqarfigisaanniit namminerisamik pigineqartuusoq attartorneqarsimavoq.
Umiarsuaq takornariartaat umiatsianut aqqutissiuisinnaavoq
Aviisi Sermitsiaq.AG allappoq, ilisimatusartut sisamat, piniartullu pingasut, illoqarfimmiit kilometerinik 30-nik ungasissusilimmi sikorsuarnit ulluni unnuanilu pingasuni mattussaanermikkut nikinnaveeqqasimasut.
Ullumi ualisoq Mette Pike Barselajsen Nanu Travelimeersoq tusagassiutinut allagaqarpoq, qulimiguulik attartugaq ilisimatusartunik sisamanik aallertussaq aallartinneqassasoq, ilisimatusartunillu Nerlerit Inaannut timmissunneqassasut, tamannalu tassa massakkut pivoq, politiit oqarput.
Mette Pike Barselajsen Sermitsiaq.AG.mut nangilluni oqarpoq, ajornanngippat umiarsuaq takornariartaat illoqarfiup ungasinngitsaaniittoq sikumik aserortereqataasinnaagaluartoq, taamaalilluni umitsiat marluk suli sikorsuarniittut ingerlaqqissinnaaniassammata.
